Россияны Ахтарыв комитетини Дагъыстан ахтарыв управлениеси республиканы оьр охув ожакъларыны бирисинде халкъара байлавлукъланы бёлюгюню жаваплы къуллукъчусуна къаршы уголовный иш ачгъан.

Ахтарывчулар токъташдырагъан кюйде, ол Иордания пачалыгъыны ватандашы булан  сёйлешип, тийишли гьакъгъа Дагъыстангъа ялгъан документлер булан Сирияда турагъан жагьил адамланы чакъыра болгъан. Олар Магьачкъалагъа етишгенде, охув ожакъны общежитиесинде ерлешдире тургъан. Арадан заман гетип, Сириядан гелгенлер гьар тюрлю ёллар булан  Гюнбатыш Европаны пачалыкъларына  гёче болгъан.

Тергевлер узатылып тура.  Аманлыкъны къоруйгъан къурумда гьалиге не охув идараны ва кимни гьакъында  сёз юрюлегенни  гьакъында билдирмейлер.

 

Алав АЛИЕВ.