Магьачкъалада июль айны биринден тутуп, маршрут таксилердеги ёл гьакъ гезикли керен артгъан. Къоллавчулагъа алдагъы 27 манатны орнунда 32 манат тёлемеге тюшежек.

Транспорт къурумланы есилери себебин гьаманда йимик ягъарлыкъны, ярашдырывну багьалары алышынгъаны, сайки шайлы гётерилгени  булан байлама къарайлар. Шону булан бирге неге Россияны оьзге уллу шагьарларында ёл гьакъ йыллар булан бир кююнде тура деген соравгъа мекенли жавап берип болмайлар.

Белгили кюйде, жамият транспорт булан аслу гьалда пенсионерлер, студентлер, кёп яшлы агьлюлер пайдалана. Тюзюн айтгъанда, тахшагьарда нас, тыгъылып толгъан маршрутка булангъы «сапар» адамда  янгыз ачувлу, оьчлю гьислени ва ойланы  тувулунувуна себеп болуп токътайдыр деп эсинге геле. Дагъыстанны ич ишлер министерлиги аян этген маълуматлагъа гёре, республикада къолланагъан  24508 маршрут таксилени 95 проценти эсгиленген. Шоланы ярашдырмакъ учунгъу харжланы да  транспорт есилери  маршруткалар булан пайдаланагъан халкъ  тёлегенни сюе ва шо саялы бир токътамай  ёл гьакъны багьасын гётере, 32 манат булан да токътамажакъ.

Ерли жамият шагьар администрациядан ва монополиягъа къаршы иш гёреген федерал къурумну регион бёлюгюнден тахшагьардагъы транспорт булан байлавлу масъаланы бир ёрукъгъа, низамгъа салмакъны талап эте.

 

Алав АЛИЕВ.