Оьтген къаттыгюн Буйнакск районну Тёбен Къазаныш юртунда Украина бойда юрюлеген хас асгер гьаракатны ортакъчыларына багъышланып чалт шагьмат оюнлардан Дагъыстан Республиканы кубогуну уьчюнчю бёлюгюню ачыкъ чемпионаты оьтгерилди.
Турнир Буйнакск район администрацияны ва ДР-ни шагьмат Федерациясыны сиптечилиги булан гьазирленген эди. Турнирде 70-ден артыкъ оюнчу лап яхшы шагьматист деген атгъа ес болмакъ учун къаст этдилер. Юрюлген ярышлар инг де бажарывлу шагьматчыланы атларын аян этди.
Дагъыстанны шагьмат Федерациясыны ёлбашчысы, халкъара гроссмейстер Жакъай Жакъаев эсгереген кюйде, ярышны ортакъчылары бири-бирин алданокъ яхшы таный ва уьчешивлеге къаныгъывлу кюйде гьазирленип гелгенлер.Натижада бу турнирде биринчи ерни шагьмат оюнну 13 йыллыкъ халкъара устасы Таймаз Темирбеков къазанды, магьачкъалалы Элчин Цахаев гюмюш, хасавюртлу Халил Акимов бронза медаллагъа ес болдулар.
Жабрайыл Алмасханов Буйнакск районну инг яхшы шагьмат оюнчусу деген атгъа ес болма бажарды. Оюнну бу журасында экинчи ер Малик Ражабовгъа, уьчюнчю ер де Магьамматшапи Хузайматовгъа тапшурулду.
Оюнларда ортакъчылыкъ этип алдынлы ерлени къазанма бажаргъан спортчулагъа медаллар, дипломлар ва акъча савгъатлар берилди.
Гюлзар КАЗИМОВА.
СУРАТДА: оюнлар юрюлеген вакъти.
