Алдындагъы гюнлер Буйнакск шагьарда 270-ден артыкъ адамгъа врачланы кёмеги тарыкъ болгъан. Гьали мекенли токъташдырылгъан кюйде, олар барысы да уьйлеринде къоллайгъан ичеген сув булан агъулангъан.
Агъуланып азарханагъа тюшгенлени кёбюсю – яшлар. Дагъыстанны савлукъ сакълав министерлиги Буйнакскидеги медиклеге кёмекге югъагъан аврувланы республика центрыны къуллукъчуларын бакъдыргъан. Артдагъы маълуматлагъа гёре, агъулангъанланы гьалы къоркъунчлукъну тувдурмай.
Шагьар администрация ва олагъа къошулуп бир-бир сахават фондлар да ерли халкъны таза ичеген сув булан таъмин этмек учун, Буйнакскиге машинлер булан шишалагъа тёгюлген сувну ташый, тек барысына да етишмей. Тюкенлерде сатылагъан сув да къыт болгъан.
Сувну сан янын тергемей къоллавчулагъа бакъдыргъан «Буйнакскводоканал» муниципал къурумгъа къаршы уголовный иш ачылгъан. Ахтарывчулардан къайры, прокуратура да оьз янындан тергевлер оьтгережек.
Алав АЛИЕВ.
