Бугюнлерде Украина бойдагъы хас асгер гьаракатда ортакъчылыкъ этип, Ватаныны парахатлыгъын ва харлысызлыгъын къоруй туруп, жанын къурбан этгенлени, сыдрасына биз нечакъы сюймесек де, бирдагъы къоччакъ уланны аты къошулду. Йигирма уьч йыллыкъ Руслан Атутаров хас асгер гьаракатда командирлерини тапшурувун кютегенде игит кюйде жан берген. Малайик йимик асил улан, аз яшаса да, оьзюню артындан ярыкъ эсделиклер къоюп гетген.
Ол 2000-нчи йылны октябр айыны 21-нде Тамазатёбе юртда Атутаровланы асил тухумунда тувуп, гиччиден загьматгъа къуршалып оьсген улан эди. Ата юртундагъы школада 9 класны тамамлап, загьмат ёлун башлагъан деп айтсакъ да ялгъан болмас. Ону уллатасы шагьардагъы уьйлерин де къоюп, ата юртунда юрт хозяйство тармакъда чалышгъан. Ол «Дагъыстанны юрт хозяйствосуну ат къазангъан къуллукъчусу деген сыйлы атгъа да ес болгъан.
Уллатадан юрт хозяйство тармакъны сырларын билген Русланны юрт хозяйство техникагъа да ва компьютерлеге де усталыгъы ва гьаваслыгъы болгъан. Жагьил улан оьзюню тенглилери йимик загьмат ёлун йыракъ Темиркъазыкъ бойларда давам этмеге токъташа. Дейгеним, 2023-нчю йылны язбашында Руслан Нефтеюганск шагьарда ишге гирише .
Шо йыл декабрде Ханты-Мансийск шагьарда Россия Армия булан дыгъар байлагъан. Къысгъа болжалда уьйренивлерде ортакъчылыкъ этип, Украина бойларда юрюлеген хас асгер гьаракатгъа къуршалгъан.
Биринчи гюнлерден тутуп, Руслан Атутаров оьзюн къоркъув билмейген, къоччакъ ва игит улан кюйде гёрсетмеге бажаргъан. Ол дав ёлдашларыны арасында низамлы ва инамлы асгер къуллукъчу гьисапда белгили болгъан. Даим де командирлерини тапшурувларын кютмеге гьазир тургъан.
2024-нчю йылны март айыны 17-нде Авдеевка бойдагъы миллетчилеге къаршы турувларда тамазатёбели улан Руслан Атутаров оьзюн къызгъанмай ябушуп, игит кюйде жан берген.
Россия Федерацияны Президенти Владимир Путинни Указы булан Руслан Атутаров Къоччакълыкъны ордени булан савгъатлангъан. Игит улан бу сыйлы савгъатгъа оьлген сонг лайыкълы болгъан. Батыр уланны тарбиялагъан ата-анасына Аллагьутаала оланы юреклерине сабурлукъ ва маслагьат салсын деп айтмагъа сюебиз.
Гертилей де, ону атасы Арсен ва анасы Альбина уланын герти патриот ругьда, Ватаныны якълавчусу гьисапда оьсдюрген. Ол уллулагъа гьюрмет этип, гиччилеге гьайлы янашып, адамны къуллугъун кютемен деп башюсте турагъан улан эди. Жагьил уланны тас этив сав юртну халкъы учун уллу къайгъы болду. Русланны юртда кёп сюе эди. Огъар кёбюсю юрт арада, малайик йимик улан деп айта эди.
Бугюнлерде юртну «малайиги» бизин арабызда ёкъ. Ол йыракъ кёклеге учуп гетген амин къушгъа ошагъан. Озокъда, ата-анасына биргине бир уланын тас этмеге тынч тюгюл. Руслан яшлайын яшавдан гетди. Оьзюнден сонг гиччи къызардашлары Макка ва Райса да амалы ёкъгъа инанып болмайлар.
Бизин ата-бабалар айтагъанлай, ат оьлсе майдан къала, игит оьлсе аты къала. Руслан Атутаровну да аты ону таныйгъанланы юреклеринде ва эсинде къалажакъ.
Бэлла ГЬАЖИГЕЛДИЕВА,
Россия Федерацияны журналистлени
союзуну члени.
