Бугюн Уллу Ватан давну актив ортакъчысы, оьмюрю 101 йылгъа айлангъан Ильяс Батырханович Къазиханов гечинген деген къайгъылы хабар етишди.
Ильяс Къазиханов 1923-нчи йылда Буйнакск районну Тёбен Къазаныш юртунда тувгъан. 1941-нчи йылда юртдагъы школаны яхшы къыйматлар булан битдирген. Ватан давгъа йибермекни тилеп, сав классы булан военкоматгъа бара, тек комсомолну райкомуну тапшурувуна гёре, 17 йыл болагъан Ильяс гиччи класланы муаллими этилип йибериле.
Токътавсуз язагъан арзаларына гёре, шо йыл декабр айда ону Тбилиссидеги артиллерия училищеге йибере. Уьч йыллыкъ курсланы 3 айдан тамамлап, лейтенант И.Къазыханов 61-нчи атышывчу дивизияны 55-нчи артиллерия полкуна йибериле.
Ол Темиркъазыкъ Кавказны немислерден азат этмек учунгъу давларда гёрсетген къоччакълыгъы учун ол кавказлылардан биринчилерден болуп «За боевые заслуги» деген медаль булан савгъатлангъан.
Шондан сонг ол Украинаны, Молдавияны, Румынияны, Болгарияны, Югославияны, Венгрияны, Австрияны ва Чехословакияны азат этгенлени бириси. 1945-нчи йылда ол Япониягъа къаршы давларда да ортакъчылыкъ этген.
Дав йылларда гёрсетген игитлиги учун 2 керен Ватан давну 2 даражалы, Къызыл Юлдуз орденлер, 2 керен «За боевые заслуги» ва дагъы да 20 тюрлю медаллар булан савгъатлангъан.
Давдан сонг 10 йыллар асгерде къуллукъ этген ва полковник чинге ерли гётерилген. Шолай да ол маданият ва юрт хозяйство министерликлерде кёп йыллар ишлеген. Агьлюсю булан татувлу ожакъ къуруп 70 йыллар яшагъан.
Алдындагъы йыл Ильясны 100 йыллыкъ юбилейине баргъан Дагъыстанны Башчысы Сергей Меликов ону атын даимлешдирмек учун Тёбен Къазанышда билим берив ожакъгъа атын такъма ва бюстун салмакъны тапшургъан эди.
Бугюн буса Сергей Алимович Телеграм каналында ветераны дос-къардашына оьзюню къайгъырышывун билдирди.
Шонда «Дос-къардашына теренден къайгъырышывумну билдиремен. Ятар еринг къув болсун, асгерчи ва загьматчы. Уьстюнлюкню солдатына даим де макътав!» — деп язылгъан.
Дагъыстанны Башчысыны сёзлерине «Ёлдаш» газетни коллективи ва охувчулары да къошула. Жаны женнетде болсун!
