Яшавубузда пагьмулу адамлар булан кёп ёлугъабыз. Тек олагъа тийишли тергев бермейбиз. Шолай айсенилик, гьакимият къурумланы ягъындан да ёкъ тюгюл. Натижада оланы кёбюсю янгылыкълары яшавгъа чыгъарылмай да къала.
Биз бугюн оьзюню гьакъында язагъан адамыбыз Дагъыстандан оьтюп, гьатта Россияда да яхшы белгили. Ону аты Гьамит, фамилиясы буса Халитов. Ол уллу къумукъ юртланы бириси Тёбен Къазанышда тувгъан.
Майны 28-нде биз Гьамит Халитовну Къаягент районну охувчу яшлары ва муаллимлери булан оьтгерилген ёлугъувунда ортакъчылыкъ этдик. Булай ёлугъувлар айрокъда гьалиги девюрде бек тарыкълы. Айтагъаным, Гьамит Юсупович инженер, гьатта алим гьисапда белгили.
Пачалыкъланы арасында артдагъы йыллар юрюлюп турагъан дав къалмагъаллар гьалиги наслулардан гьар тюрлю техниканы тындырыкълы билмеге, оланы уьйренивге гьаракатчы янашывну талап эте. Школаланы охуп битеген яшёрюмлер ювукъ арада асгер борчларын кютмеге асгер къуллукъгъа чакъырылмагъа бола. Олар – бизин гележекдеги якълавчуларыбыз. Шо гёзден алгъанда Гьамит Юсупович булан болгъан ёлугъув бек пайдалы оьтдю. Ёлугъувну Къаягент районну охутув-билим берив бёлюгюню къуллукъчулары онгаргъан. Юртлардагъы орта школаланы муаллимлери эки де якъгъа пайдалы чарагъа рази къалдылар.
Башлап сёз Гьамит Юсуповичге берилди. Ону терен маъналы доклады залгъа жыйылгъанлагъа бек таъсир этди. Булай адамлар булангъы ёлугъувланы не пайдасы бар экен деген башлапгъы ойлар ёлугъувну сонггъу барышында тез тайды. Шону биз де тез англадыкъ.
Магьамматрасул ИБРАГЬИМОВ,
Къаягент район.
