Бугюнлерде бизин уьлкеде яшланы ва яшёрюмлени къуршайгъан «Зарница 2:0» деген асгер-патриот оюнну аслу тиретлери юрюле. Бизин республикада да, умуми кюйде алгъанда, оьзюне 8 йылдан 17 йыл чагъына ерли 30 мингге ювукъ яшлар къуршалгъан шо гьаракатны къурумлу оьтгермек учун алданокъ таман чакъы гьазирлик гёрюлген.
Дагъыстанны жагьиллени ишлерине къарайгъан министерлигини, асгерге чакъырмагъа чагъы етишмеген яшёрюмлени патриот якъдан тарбиялавгъа къарайгъан центрыны, олай да «Алдынлыланы гьаракаты» деген Бютюнроссия бирлешивюню ерли къурумуну жаваплы къуллукъчулары ва касбучулары бирликде шо агьамиятлы гьаракатны туварып къоймасны къастын болдурду.
Шо гьакъда айта туруп, эсгерилген оюнну вакътисинде яшланы ва яшёрюмлерини гьар тюрлю тармакъларда билимлерин артдырывгъа, бажарывлугъун камиллешдиривге аслу тергев берилгенин айрыча эсгермеге тюше. Ачыкълашдырып айтгъанда, башлапгъы медицина кёмекни болдурувгъа, табии шартларда оьтгерилеген сынавлагъа, дронланы къоллавда бажарывлугъун гёрсетивге айрыча тергев бакъдырылды. Шону булан бирге, оюнну ортакъчыларына оьзлени чыдамлыгъын исбатламагъа болагъан кюйде спортну гьар тюрлю жураларындан юрюлеген ярышларда ортакъчылыкъ этмеге шартлар да яратылды.
«Дагестан» деген маълумат агентлигинде болгъан прес-конференцияда оьрде эсгерилген оюнну шартлары малим этилди. Бизин республиканы газетлерини мухбирлерине шо гьакъда Дагъыстанны жагьиллени ишлерине къарайгъан министри Камил Сайитов, асгерге чакъырмагъа чагъы етишмеген яшёрюмлени патриот якъдан тарбиялавгъа къарайгъан центрыны директоруну заместили Сайит Гьажиев ва «Алдынлылыланы гьаракаты» деген Бютюнроссия бирлешивюню республика бёлюгюню председателини заместители Рашит Абдуллаев берген баянлыгъында шо гьакъда белгили болду.
Оланы сёзлерине гёре, «Зарница 2:0» оюнну башлапгъы тиретлеринде оьтгерилеген сынавлардан яшланы ва яшёрюмлени 10 мингге ювугъу уьстюнлю кюйде оьтген. Оюнну барышында шону ортакъчылары оьтеген сынавларда бир тюрлю алмашынывлар этилген. Оюнгъа къуршалгъан уланланы ва къызланы атышыв савутланы къоллавда, журналистикада, айрыча алгъанда, къалп маълуматланы малим этивде, карталаны къоллап иш гёрювде усталыгъын гёрсетмеге имканлыкъ бериле, оланы Уллу Ватан давну тарихине байлавлу билимлери де тергеле. Шолай шартларда яшланы ва яшёрюмлени аманлыгъын болдурувгъа да тергев бериле.
Гьайдакъ районну «Огонёк» деген яшланы ял алыв лагеринде бугюнлерде юрюлеген оюнну финал тиретинде 12 командагъа къуршалгъан 100-ден де артыкъ уланлар ва къызлар оьзлени ортакъчылыгъын болдурду. Росгвардияны Дагъыстан Республикадагъы управлениесини «Скорпион – Каспий» деген ОМОН-уну къуллукъчулары бир башлап инженер-сапёр гьаракатланы юрютюв къайдаларын гёрсетген сонг, оюнну ортакъчыларына шо тармакъда оьзлени сынамагъа да имканлыкъ берилди. Оьрде эсгерилген асгер бёлюкню къуллукъчусу башлапгъы медицина кёмекни болдурувдагъы билимлерин тергеп, яшлар йиберген янгылышланы гьакъында англатыв берди.
Шондан къайры да, Росгвардияны касбучулары асгер къуллукъчуланы гьазирлейген оьр охув ожакълагъа тюшювню шартлары гьакъында айтды. Шоларда билим алывну шартларын ачыкъ этеген видеороликлени де гёрсетди.
Дагъыстанны Башчысы Сергей Меликовну якълаву булан уьч гюнню узагъында юрюлген «Зарница 2:0» деген оюнну республика тиретини гьасиллери май айны 31-не белгили болду. Оюнну бары да ортакъчыларына гьюрметлев грамоталар, дипломлар берилди. Алдынлы ерлеге ес болгъан Къызлар, Южно-Сухокумск, Магьачкъала шагьарлардан, олай да Къаягент ва Къазбек районлардан гелген командалагъа къуршалгъанлар медаллар булан бирче асгер-патриот оюнланы еринде, охув ожакъларда оьтгермеге тарыкъ болагъан чакъы бары да ясандырывлар ва алатлар булан савгъатландылар. Шондан къайры да, олар бу йылны сентябр айында оьтгерилежек «Зарница» деген оюнну Темиркъазыкъ Кавказ федерал округуну оьлчевюнде ювукъда оьтгерилежек тиретинде ортакъчылыкъ этежек.
Н. БАЙБОЛАТОВ.
