Дагъыстанны къыбласында ерлешген Къаягент районда къоллавчуланы ял алыв ва савлукъ сакълав масъалаларын ёрукълашдырывгъа байлавлу болуп оьтгерилеген чаралар тергевню тарта. Районну башы Магьаммат Элдерхановну баянына гёре, шону учун минглер булангъы гектарланы пайдаландырмагъа умут этилине.
Къаягент районну денгиз ягъасында, гертиден де, ял алагъанланы савлугъун беклешдирмеге имканлыкъ береген онгайлы табиат шартлары да болушлукъ эте. Лап да аслусу – ягъа бойланы къайыры ва денгизни суву таза сакълана.
Бугюнлерде бизин республикабызгъа, айрокъда Къаягент бойгъа, къонакълай гелеген туристлени санаву белгили кюйде артып тербей. Шону гьисапгъа алып, ял алмагъа гелегенлер учун онгайлы къуллукъланы болдурув да тергевсюз къалмагъа тюшмей.
ДР-ни туризм ва халкъ саниятларыны масъалаларына къарайгъан министерлиги билдиреген кюйде, Къаягент райондагъы «Инчхе» деген темир ёл станцияда ял алмагъа муштарлыланы санаву алдагъы заманларда йимик, гьали де, кёп болса тюгюл, аз болмай. Ич ва тышдагъы талапланы гьисапгъа алып, ял алагъанланы къуллукъларын яшавгъа чыгъармакъ учун чаралар гёрюле.
Тюзюн айтгъанда, ял алмагъа гелеген туристлени авадан пайы суткада 3-5 минг манатлар тёлеп Избербашдагъы къонакъюйлерде ерлешмеге борчлу бола.
Оланы иштагьаландырмакъ учун бугюнлерде «Инчхе-Марин-Каспий» деген къонакъюьй комплексин къурув башлангъан. Эсгерилген инвестиция майданда 570 миллион манат акъча маяланы харжламагъа умут этилине. Агьамиятлы проектни къурмакъ учун денгизни ичинде ва ягъа бойларында гьалиге ерли 110 миллион манатны оьлчевюнде акъча маялар харж этилинген.
«Итера» деген ихтиярлары дазуландырылгъан жамият « Инчхе» бойда 7 къабатлы къонакъюйню къуруп пайдаландырмагъа токъташгъан. Шону учун 4 гектар майданда къурулуш ишлер давам этилине. Гележекде эсгерилген инвестиция майданда аз-кёп буса да, 100-ге ювукъ адамгъа иш ерлер болдурмагъа гёз алгъа тутулгъаны гьакъда да айрыча эсгермеге тюше.
Шону булан янаша Аччы ва Папас кёллерде, оьтген йыл пачалыкъ къорукъну еси болгъан ижарачы Магьамматсабир Ибрагьимов билдирегени йимик, ич ва тыш талапланы гьисапгъа алып, ял алмагъа гелеген туристлени къуллукъларын кютмек учун онгайлы шартлар болдурула, кёллеге балыкъ урлукъ йибериле…
Къ. КЪАРАЕВ.
