Гьажгъа бармакъ, гьаж намаз къылмакъ бусурманлар учун Аллагьгъа къуллукъ этивню аслу къанунларыны бири гьисаплана. Гьажгъа барагъанланы да санаву Дагъыстанда йыл сайын арта.  Бу йыл гьажгъа бармагъа онгарылгъанланы санаву бизин республикада 10 минг 70 адам бар. Шо гьакъда «Марва-Тур» деген компанияны генеральный директору  Болат Къурбанов журналистлер булангъы  ёлугъувда толу кюйде  сёйледи.

 

Б. Къурбанов бу йыл гьажгъа бармакъ учун гёрюлеген гьазирликни гьакъында айта туруп, булай деди: «Гьаж къылмакъ учун дагъыстанлылагъа гетген йылда йимик, бу йыл да 10 мингден артыкъ ер гёрсетилген ва шо ерлер барысы да сатылгъан. Умуми алгъанда Россия Федерациядан гьажгъа  барагъанлар  учун 25 минг ер гёрсетиле. Демек, Россияны башгъа регионларына берилген квоталар бир-бирде барысы да  къолланмай буса, бизин республикада йыл сайын гьажгъа барма сюегенлени санаву, артса тюгюл, кемимей».

Бу йыл гьажгъа бармакъ учун берилеген визаны, оьзге йылларда йимик,  самолётгъа минмеге аз къалгъанда тюгюл, алданокъ  алмагъа бажарылды.  Бугюнлеге ерли гьажгъа барагъанланы 99 процентине виза ачылгъан.

Дагъыстанны аэропортундан  гьажгъа барагъанланы биринчи самолёту   май айны 29-нда учажакъ.  Гьаждан къайтмагъа буса июн айны 20-сында башлажакъ, ахырынчы самолёт июльну  2-синде Магьачкъалада болажакъ.

Шолай да, Б. Къурбановну айтывуна гёре,  гьажгъа бармагъа эки тюрлю къайда булан  имканлыкъ берилген. Биринчиси  – Магьачкъаладан самолёт булан тувра Сауд-Арабыстангъа ва Магьачкъаладан самолёт булан Дубайгъа ва ондан Мадина яда Макка шагьаргъа автобус булан.  Экинчи къайда булан бармагъа бираз учуз токътай. 4790 доллар ва  тувра Сауд-Арабыстангъа самолёт булан гьаж къылма барагъанлар 5490  доллар тёлей.

Гьаж бу йыл 21 – 22 гюн болажакъ. Оьрде эсгерилген акъчагъа еринде гьаж къылыв да гире. Къурбанов эсгерген кюйде, виза ачылгъан сонг гьар тюрлю себеплеге гёре гьажгъа бармакъ учун ёлгъа чыкъмагъанлагъа гьагъы къайтарылмай.

 

Патимат БЕКЕЕВА.