Кимлени тирменине сув тёге?
Россияны дав майданларда гюч, савут булан утуп, енгип болмажагъын яхшы англайгъан Америка ва ону шыртына бийийген Гюнбатыш Европа бизин уьлкебизни ичинден тозмакъны уллу гьайындалар. Намарт муратларына етишмек учун инг алдын миллетлерибизни арасында разисизликлени тувдурма, къаршы турувлагъа талпындырма, пелекет салмагъа белсенгенлер. Шо терс гьаракатында не йимик къайдалар, кимлер къолланагъанын хас къурумларыбыз мекенли биледир.
Амма бир-бир федерал теле ва радиоканалларыбызны берилишлерине къара-гъанда ва тынглагъанда милли масъалаланы оьрчюкдюрмек учун бизге дагъы «душманлар да» тарыкъ тюгюлдюр деген ойгъа гелесен. Олар кимлени тирменине сув тёге экен? Сюйсенг де, сюймесенг де, шо сорав оьзлюгюнден арагъа чыгъа.
Апрель айны 17-нде Россияда законсуз кюйде турагъан азербайжанлы Москваны Люблино районунда ерли орус яшны оьлтюргенини хабарын къайсыгъыз да эшитгенсиздир. Шону айланасында федерал журналистлер гётерген къувун адамны лап инче гьислерин хозгъайгъан къувун йимик чалына эди. Мисал учун, «Комсомольская правда» деген радиоканалгъа тынглайман. Мухбир болгъан агьвалатны гьакъында айта туруп тарлана, тавушу къартыллай, гьалигине йылап да йибережек деп эсинге геле. Ол шолай кимге талчыгъагъанын англама къыйын тюгюлдюр. Берилишден сонг, каналны атына гелеген минглер булангъы сесленивлер журналистни къасты, гьаракаты бошуна гетмегенин гертилей. Миллетчиликни оьртенин къабуздурма къыйын тюгюлдюр, тек шону ахыры не булан битегенине кёп керен шагьат болгъанбыз. Аллагь да гёрсетмесин! Къайсы миллетни арасында да элбузарлар бар. Тек шо бютюн халкъгъа айып салмагъа, ону къара тюслеге боямагъа ихтияр бермей.
«Новое дело» деген дагъыстанлы газетни Телеграм каналы Интернетде ерлешдирген видеороликде темиркъазыкъ тахшагьарны школаларыны бирисинде эки 15 йыллыкъ уланлар оьзлер булан бир класда охуйгъан къызъяшны токъалайлар. Урагъанда да, гючюн-къуватын къызгъанмайлар. Олар къычырагъан миллетчи чакъырывланы эсгерме де сюймейсен. Муаллими буса ариде токътап къарап тура, оьзге яшлар да олтургъан ерлеринден турма алгъасамайлар, гьатта бирлери леззет алагъандай, къолуну баш бармагъын оьрге чюелер. Шо нени англатагъанын арабызда билмейгенлер ёкъдур. Видеоролик бек гёнгюмню бузду.
Башлап шо зараллангъан къызъяш дагъыстанлы деген маълумат яйылды. Гьатта республикада ватандашланы ихтиярларын якълайгъан вакил Жамал Алиевге ва Украинадагъы хас асгер гьаракатда ортакъчылыкъ этеген дагъыстанлы офицерлеге сесленме тюшдю. Тек сонг къызъяшны ата-анасы тажикли экени токъташдырылды.
Оьсюп гелеген яш наслу ялгъан «ваъзачыланы» таъсирине тез тюше. Эгер де, биз уьлкебизде милли парахатлыкъ болгъанны сюе бусакъ, инг алдын оьз уьюбюзню ичинде «тазалыкъ» болдурмагъа герекбиз.
