Украинада хас асгер гьаракат башлангъандокъ, дав агьвалатлар юрюлеген ерлерде медицина къуллукъчуларда уллу гьажатлыкъ тувулунгъан эди. Авлакъ госпиталлардагъы врачланы, медсестраланы бугюнгю иши эпсиз къыйын, къоркъунчлу ва федерал телеканалланы сюжетлерине сийрек тюше. Тек яралангъан асгерчилени яшаву кёбюсю гезик оланы касбу бажарывлугъундан, тувра борчларына янашывундан гьасил бола. Шо якъдан медицина къуллукъчуланы ишине сёз тапма къыйын.

 

Шолай тавакаллы адамланы арасында дагъыстанлылар да бар. Фельдшер Маржанат Шейхова хас асгер гьаракатгъа уьюнде эки къызын ва 5-нчи класда охуйгъан уланын да къоюп, гёнгюллю кюйде къуршалгъан. Ол хыйлы йыллар «скорый помощда» ва шагьар азарханада ишлей туруп, бай сынав топлагъан. Амма давлар-явлар юрюлеген ерлерде гёргенине парахат яшавда алданокъ гьазирленмеге бажарылмай.

Маржанат Буйнакск районну Тёбен Жюнгютей юртунда тувгъан. Школаны битдирген сонг, Буйнакскидеги медучилищени фельдшер бёлюгюне охума тюшген ва 1998-нчи йылда уьстюнлю кюйде тамамлап, сыйлы касбусунда биринчи абатларын алмагъа башлай.

Неге Оборона минис­терлик булан дыгъар байлагъан? Шо да къыйын­лы яшав шартлагъа тарыгъанлыкъ себеп болуп токътагъан. Бираз алда Маржанатны эри юрек аврувдан оьлген. Ол ожакъда уьч тораймагъан яшлары булан къалгъан, лап гиччисине 11 йыл битген. Тек огъар шолай къараргъа гелмек учун бирдагъы себеп болгъан.  Маржанатны эркъардашы да Украинадагъы хас асгер гьаракатда ортакъчылыкъ эте.

– Ойлашдым, балики мени кёмегим биревню яшавун къутгъарар,– дей ол.- Мени дуаларым буса эркъардашыма эсен-аман уьюне къайтма имканлыкъ бережегине инанаман.

Озокъда, Украинадагъы бизин асгерчилеге къошулмакъ деген къарар къыйынлы буса да, бары да якъдан ойлашылып къабул этилди. Яшлар башлап анасын йиберме сюймей, тек ону мекенли токъташгъанлыгъын гёрюп, сонг якълайлар. Чакъ-чакъда зенг этелер, смс-лер бакъдыралар.

– Уьйден гелеген якълавну (шо янгыз дос-къардашым тюгюл, къурдашларым, алдагъы иш ёлдашларым), бизин учун уллу агьамияты бар. Къаркъарабыз  бек къавшалагъандан къайры, заманда бир терен, пашман ойлагъа да батып талабыз. Асгерчилени бизин госпитальгъа гьар тюрлю гьалларда етишдирелер, башына, къурсагъына гюлле  булан авур  яралангъанлагъа инг алдын алгъсавлу кёмек этмеге тюше. Бизин аслу борчубуз – яралангъан адамны гьалын тез къолайгъа къайтармакъ, ону, хыйлы къан тас этсе де, оьлюмден къутгъармакъ. Шо бек  уллу ва гьалынгны битдиреген жаваплылыкъ. Уьйдегилер булан гьакълашыв буса – таза гьаваны тынышы йимик.

– Маржанат Апендиевна, сизин ондагъы биринчи гюнюгюз нечик оьтген эди?

– Мен бир тамаша уллу гьалекленивню гьис эте эдим – мунда бир мюгьлетге де тергевсюз, гьайсыз болмагъа ярамай.  Бизде не йимик къаравулланма­гъан гьаллагъа гьазирлик болсун учун, офицерлер  бизин иш этип къоркъута эди. Ерли адамлар булан бир байлавлукъ да болма тюшмей деп алданокъ бувара эди. Шагьаргъа да асгер опуракъ булан чыкъмагъа ярамай эди.

– Гьали алышынгъан зат бармы?

– Нечакъы къыйын буса да, уьйренчик болуп битдим.

Фельдшер Шейхова оьзю­ню борчларына бек жаваплы кюйде янаша, командирлери де шону эс этмей тюгюл, тийишли къыймат берме унутмайлар. Гьали-гьалилерде огъар госпитальны начальнигини атындан баракалла билдирилген. Шо сююнчлю хабарны ол яшларына ва къардашларына тез етишдирмекни гьайын этген.

– Биз бизин Маржанатыбызда бир де шекленмей эдик,– дей Буйнакск шагьар азархананы баш врачыны борчларын заманлыкъгъа кютеген Гюляйбат Гьасанова. –Ол бизде, «скорый помощда» ишлей туруп, бай  сынав топлады, гьали шо огъар къайсы четим гьаллардан да оьтмеге, тюз къарарлагъа гелмеге кёмек эте.

Озокъда, Маржанат Апендиевна уьюне шексиз кюйде къайтажакъ.  Яшлары буса анасы булангъы ёлугъувгъа къалгъан гюнлени белгилей.

 

Алав АЛИЕВ.