Магьачкъаладагъы темир ёл станцияны складындан шо къурумда ишлейген 59 йыллыкъ къуллукъчу гьар тюрлю темир алатланы урлагъан.
Ол станциядагъы ва складны айланасындагъы низамны яхшы биле. Шо саялы машинин парахат кюйде складны ичине гийирип, багажнигин темир булан толтургъан. Буса да шо мюгьлетде ону гёргенлер болгъан ва шоссагьат транспорт полициягъа зенг этип билдиргенлер.
Полицейскийлер уручуну къайда къаравуллама тюшегенин билген. Жинаятчы эсги темирни къабул этеген пунктну къапуларыны алдында тутулгъан.
Темир ёл станцияны управлениесинде билдирегени йимик, урлангъан темирни багьасы 10 минг манатгъа етише. Гьали эсли адамгъа абур, сыйы да къазанып, Гьюрметли темирёлчу деген атгъа да ес болуп, пенсиягъа чыгъагъанны орнунда, ювукъ йылларын туснакъда оьтгермеге тюшежек.
Алав АЛИЕВ.
