Дагъыстан Республиканы шагьарларында ва районларында турагъан халкъны санавуна байлавлу маълуматлары аян этилген.
2023-нчю йылны 1-нчи январындан тутуп, бу йылны шо вакътисине ерли гьаллар булан таныш болгъанда, онча талчыкъма себеплер де ёкъ йимик гёрюне. Озокъда, шагьарлар булан тенглешдирмеге бажарылмай, буса да юрт ерлерде де адамланы санаву къошулагъаны сююндюрмей болмай.
Мисал учун, халкъны санаву Бабаюрт районда 239, Буйнакск районда 761, Къаягент районда 630, Къызылюрт районда 763, Къарабудагъгент районда 1964, Хумторкъали районда 424, Хасавюрт районда 2165 адамгъа артгъан. Гьатта мени ата юртум Кахулайгъа да 7 адам къошулгъан.
Тюзюн айтгъанда, шону себеплерини гьакъында бир зат да эсгерилмей. Шону булан байлавлу ахтарывланы, къарагъанда, бизге оьзюбюзге, журналистлеге оьтгермеге тюшедир.
Алав Алиев
