Магьачкъаладагъы Киров район судда 42 йыллыкъ ерли къатынгишини уголовный ишине къаралгъан. Ол гиччи яшны къыйнай болгъан деп айыплана.

 

Судгъа бакъдырылгъан материаллагъа гёре,  ол 2021-нчи йылны яй айларындан тутуп, 2023-нчю йылны апрель айына ерли  оьзюню 9 йыллыкъ оьгей къызын гьар гюн дегенлей токъалай болгъан. Къолу булан урагъандан къайры, къаршы гелген затны алып къоллама да гьеч тартынмагъан. Яшны атасы шо гьалны гёрюп тургъан, тек янгы къатынына бир зат да айтып болмагъан.

Гиччипав дагъы  чыдап болмай, бир гюн оьзю­ню анасыны янына къачгъан. Ол къызыны гьалын гёрюп, шоссагьат врачланы уьстюне алып баргъан ва судгъа арза берген.

Судда оьгей ана: «Мен ону оьзюмню къызымны йимик сюе эдим, заманда бир тарбияламакъ учун астаракъ къапаслар бере эдим», – деп, ялгъанлар айтып къутулма къарагъан.

Суд къатынгишини 3 йылгъа эркинликден магьрюм этмек деген къарар чыгъаргъан. Къарар ону лап гиччи яшына 14 йыл битгенде гючге гирежек.

Тек  яшлагъа бакъгъан якъда янгыз ­оьгей аналар оьчлю болмай экен. Россияны Ахтарыв комитетини Дагъыстан ахтарыв управлениесинде Магьачкъалада турагъан 41 йыллыкъ ерли адамны уголовный ишине де къаралып тура.

Ол къатындан айрылгъан сонг, 14 ва 10 йыл болагъан уланларын оьзю булан къойгъан. Гьали ахтарывчулар токъташдырагъан кюйде, яшларын къапас ва юмурукъ булан тарбиялай болгъан. Яшланы уллусуну чыдамлыгъы битип, уьюнден къачгъан.

Гьали яшланы къысматын суд чечежек.

 

Алав АЛИЕВ.