Агьлю жамиятны, яшавубузну  аслу кюрчюсюнден къайры да, ону тенги, багьасы ёкъ гьарибизни инг асил,  къысматыбызны гюнесувдай таза  агъагъан  указаны баш булагъына гьисаплайбыз.

 

Россияны Президенти Владимир Путинни указына гёре, бу йыл Агьлюню йылы деп белгиленген. Шо агьвалат булан байлавлу да, 2024 – 26-нчы йыллагъа ерли халкъгъа гьавайын медицина кёмек этив пачалыкъ программагъа  янгылыкълар къошулгъан. Шогъар гёре, дагъыдан да  кёп адамгъа  ата-ана болмагъа имканлыкълар тувулунгъан.

Айтагъаным, яш тапмагъа ярайгъан чагъын­дагъы къатынлар ва эренлер бу йылдан тутуп, бирче, бир вакътиде бир башлап аврувларын алдын алмакъ учун, медицина къаравлардан, диспансеризациядан оьтежеклер. Шону булан бирге  оланы яш тапмагъа болагъан даражада савлугъу бары-ёгъу­на багьа берилежек. Шо учун тийишли, тарыкълы  бары да медицина тергевлер страховой полисге гёре гьавайын этилежек. Неге тюгюл, гележекде туважакъ сабийлени савлугъу аслу гьалда анасыны къаркъарасыны гьалындан гьасил бола. Эгер  медицина къаравларлан сонг  ата-ана болма сюегенлени  савлугъу яхшы чыкъса, авлетни масъаласы парахат  кюйде чечилежек.  Яшгъа токътагъан вакътини ичинде де, ону тапгъанда да, ондан сонггъу яшавунда да гиччипавну  савлугъуну тетиги болмасын учун, эр-къатын санларындагъы аврувларын ачыкъ этмек, билмек  муратда   олар алданокъ медицина къаравлардан чыкъмагъа борчлу.

–Медицинагъа байлавлу пачалыкъ программагъа бу алмашынывлар  къатынлар яшгъа токътагъанча, бир башлап эр де, къатын да  бирче врачлардан оьтюп, оьз­лени аврувларын алдын алсын, баш чарасын гёрсюн деп  этилинген. Олар  савлугъуну гьайын этсин учун шартлар яратылгъан. Эр-къатын насипли ата да, ана да болма  хыялы бар буса, олар биринчилей яшгъа зарал гелтирежек  ва янгы билинип турагъан  аврувларына гьайлы янашып, шоланы сав этмекни гьакъында  ойлашма тарыкъ.

– Россияны медицина страхованиеси ватандашлагъа эркин кюйде имканлыкълар бере. Оьзю­гюзню ва  бизин гележекдеги сав-саламатлы яшавубуз учун яратылгъан онгайлыкълагъа  къол силлемей, шолардан пайдаланмагъа къарагъыз, – деп чакъырыв эте ТФОМС-ну Магьачкъаладагъы филиалыны касбучулары.

Паху ГЬАЙБУЛЛАЕВА.