Дагъыстанда да уьлкебизни оьзге регионларында йимик «Мюлк есини гюню» деген бютюньроссия проектни талаплары яшавгъа чыгъарылагъаны арадан 10 йыл тамамланды.
Юбилей болжалны алдында «Дагъыстан» деген республика маълумат агентлигинде ДР-ни баш яшавлукъ пачалыкъ инспектору Сергей Касьянов оьзюню прес-конференциясында бу гезик юбилей проект нечик оьтгерилежеги гьакъда регионну журналистлерине баянлыкъ берди.
– «Мюлк есини гюню» деген бютюнроссия юбилей проект бу гезик апрель айны башындан тутуп июн айны 13-не ерли давам этилежек, – деди Сергей Владимирович оьзюню баянында. – Эсгерилген проектни оьлчевюнде кёп квартирлик уьйлерде яшайгъан есилери булан байлавлукъда управляющий компанияланы башчылары къоллавчулар не йимик яшавлукъ-коммунал къуллукъларындан къыйыкъсытылагъанын аян этмек учун умуми жыйынлар оьтгережек. Шогъар байлавлу болуп толу маълумат «Госуслуги. Дом» деген Интернет бокъчада толу кюйде англатывлар береген материаллар ерлешдирилген. Муна шо саялы да, гьар мюлк есиси оьзлер учун онгайлы уьйден туруп онлайн-жыйында ортакъчылыкъ этмеге имканлыкъ береген электрон къуллукъланы кютмеге уьйренмеге герек.
Белгили болгъаны йимик, савлай Дагъыстанда кёп квартирлик уьйлени умуми санаву 4815-ге етишген. Тек не этерсен, шоланы барысында да управляющий компаниялар етишмей. Барлары да борчларына сувукъ-салкъын янаша. Натижада, къоллавчулар чакъда-чакъда яшавлукъ-коммунал къуллукъларындан магьрюм къала. Неге тюгюл, оьз заманында къуллукъланы береген къурумлар булан байлавлукъда тийишли дыгъарлар этилмей. Этилинген дыгъарланы шартлары да къоллавчуланы толу кюйде рази къалдырмай. Неге десегиз, этилинеген къуллукъланы сан яныны даражасы тёбен даражада. Уьстевюне, капитал ремонтгъа харлы кёп квартирлик уьйлерде яшайгъанланы арзаларына да толу тергев етишмей.
Прес-конференцияны барышында регионну яшавлукъ баш пачалыкъ инспектору журналистлер берген соравлагъа жаваплар къайтарды.
–Арт вакътилерде савлай Дагъыстанда йимик тахшагьарыбзда да къоллавчулар электрик токлар планлы кюйде къайтарылып яда буса бир балагьгъа тарып къайтагъаны къачан токътажакъ? – деген соравубузгъа да:
– Республикабызны электрик хозяйствосун толу кюйде янгыртыв ишлени 2027-нчи йылгъа толу кюйде янгыртмагъа гёз алгъа тутулгъан, – деп жавапланды. – Гертиден де, шо саялы уьй-мюлк есилерини янындан кёп разисизликлер тувулуна. Шоланы гьисапгъа алып, яшавлукъ инспекцияны сиптеси булан агьамиятлы къуллукъларындан къыйыкъсытлагъаны саялы арадан оьтген бир йылны ичинде 10 миллион манаты къайтарылгъан, –деген ёрукъда жавап да алдыкъ.
Къ. Къараев.
