Адамланы яшавуна сююнч, шатлыкъ, насип гелтиреген нече тюрлю гьаллар, агьвалатлар, къураллар бар йимик, оюна, гёнгюне, гьатта чархына зарал гелтиреген маллар да бар. Нечакъы къаст этсе де арадан тайдырып болмайгъан, бугюнлерде де кёбюсю гьалда яшёрюмлени арасында наркотиклер къолланагъанлыгъы барыбызны да талчыкъдыра.
Наркотиклеге къаршы гьар тюрлю оьлчевде хас къурумлар кёп чаралар оьтгерсе де, оланы сатагъанланы, яягъанланы ва къоллайгъанланы санавун кемитмеге де бажарылмай. Янгыз шагьарларда тюгюл, юртларда да наркотиклени гьар тюрлю жураларын къоллайгъанлар артып бара. Кёп къабатлы яшавлукъ уьйлени ягъаларындан оьтюп барагъанда къоллангъан шприцлени гёрюп, яшёрюмлени гележек къысматыны гьакъында ойлашмай болмайсан.
Наркотиклени бир татывун алгъан адамгъа, ондан арчылмагъа къыйын экенни исбатлайгъан кёп мисаллар бар. Узакъ заманны ичинде наркотиклени къоллайгъан-ланы буса сав этмеге, адатлы яшавгъа къайтармагъа да айрокъда къыйын масъала.
Наркотиклерден агъуланып оьлегенлени, башын айландырып, оьзлер не этегенни билмейген гьалгъа гелип, оьзюне ва оьзгелеге зарал гелтирген, сакъат этген яда оьлтюрген мисаллар да аз тюгюл.
Гьакъылбалыкъ болгъан, эсли адамлагъа наркотиклени гьар тюрлю жураларын сатагъандан къайры, яшёрюмлеге, школа чагъындагъы яшлагъа наркотиклени сатагъанлыгъы дагъы да бетер. Наркотиклеге къаршы чаралар гёрювню вакътисинде юрюлген тергевлени натижасында школаланы ювугъунда ерлешген гиччирек тюкенлерде, уллу – гиччи деп къарамай, шо агъуну сатагъанлар кёп гезиклер тутулгъан. Оланы да агьлюлери, яшлары, торунлары бар. Шо балагь бир гюн оьзлени башына да гелип къалмакълыкъ бар деп ойлашмаймы экен?
Ондан къайры, да законсуз кюйде наркотиклени сатып алгъаны, сакълагъаны, гьазирлегени учун Россия Федерацияны уголовный кодексини 228-нчи статьясына гёре 15 йыллыкъ болжалгъа ерли туснакъ этмеклик бар.
Муна бугюнлерде де Дагъыстан Республиканы ич ишлер министерлигини прес – къуллугъу билдирген кюйде, март айны 18-нден 29-на ерли наркотиклеге къаршы чара башлангъан. Эсгерилген гьаракат савлай Россияда да оьтгериле. Гьар йыл юрюлеген бу чараны ДР-ни ич ишлер министерлигини наркотиклени къоллавну тергевню тюбюнде сакълайгъан управление оьтгере.
Шу гьаракатны – наркотиклени законсуз къолланывуна ва шону алдын алывгъа жамиятны тергевюн тартмакъ учун этиле. Шолай да, ватандашлагъа наркотиклеге харлы адамланы сав этмеге имканлыкъ бары билдириле.
Эсгерилген чарагъа Дагъыстан Республиканы билим берив ва илму, яшёрюм-лерини ишлерине къарайгъан министерликлери, наркология диспансер ва башгъа къурумлар къуршалгъан. Мисал учун, 2023-нчю йылда эсгерилген чара оьтгерилеген вакътини боюнда полицияны телефонларына ва ерли администрациялагъа ва-тандашлардан 121 билдирив гелген. Шоланы арасында 35 билдирив законсуз кюйде наркотиклени къоллавгъа ва яйывгъа байлавлу болгъан, 67 билдирив наркотиклер къоллайгъанланы багъывгъа ва реабилитация этивге, дагъы да 19 Интернетни торунда наркотиклеге байлавлу маълуматланы яйывну гьакъында болгъан.
Умуми алгъанда наркотиклени яягъан 238 жинаятчы ишлер арагъа чыгъа-рылгъан. Законсуз къолланагъан 5 кило 771 грам наркотиклени гьар тюрлю журалары чыгъарып алынгъан.
Гьар йыл оьтгерилеген наркотиклеге къаршы чараланы ва ватандашланы тюшюнювюню натижасында бу агъулу, зараллы наркотиклени къоллайгъанланы ва яягъанланы санаву йыл сайын аз болажагъына умутубуз къала.
Патимат БЕКЕЕВА.
