«Ана» деген сыйлы атны юрютмеге тынч иш тюгюл. Солдатны анасы болмакъ буса – дагъы да къыйын. Неге тюгюл де, ана юрек – гьаман да авлети булан. Эсде ёкъдан гелген телефонну зенгине, авлетини гьакъында ойлаша туруп гетген узакъ гечелер – шоланы барын да ол оьзюню юрегинден йибере. Авлетим сувукъму экен? Ачмы экен? Не гьалда экен?
Шолай соравланы бугюн хас асгер гьаракатда ортакъчылыкъ этеген бизин солдатланы аналары оьз-оьзюне гьар гюн бередир. Шолай аналардан адил – янгыюртлу Дилбар Хасаева да артда къалмай. Ону эки де уланы – офицерлер. Хас асгер гьаракатны отундан оьтген. Ватан чакъырса, бугюн де гене шо отгъа гирмеге гьазирлер. Неге тюгюл де, олар шо «Ватанны якълавчусу» деген лап да сыйлы ва жаваплы касбуну сайлагъанлар.
Дилбар Хасаева 1961-нчи йылда Уллу Ватан давну ортакъчысы, хамаматюртлу Магьаммат Черивмурзаевни агьлюсюнде тувгъан. 1983-нчю йыл ерли школаны битдирген сонг, Дилбар Владимир шагьардагъы политехника институтда охувун узата. Юрт ерден йыракъ шагьаргъа гетип билим алмагъа тынч болмай. Амма ол шо четимликлерден уьстюн чыгъа ва 1988-нчи йыл оьр билимге ес бола.
Оьр билимли касбучу анадаш районуна да тарыкъ бола ва шо йыл ол Бабаюртдагъы приборлар къурагъан заводда этилген малланы сан янын тергейген инженер болуп загьмат ёлун башлай.
Шо йылларда савлай Совет уьлкеде эшмеге башлагъан янгыртывну ели алатолпангъа айлана ва шону гесеги Бабаюртгъа да етише. Айтагъаным, 90-нчы йылларда завод да тозула, онда ишлеген юзлер булангъы адамлар да ишсизлени сиягьын толтура. Дилбар да шоланы арасына къошула. Арадан кёп заман да гетмей, Дилбар адил–янгыюртлу Багьавдин Хасаев булан уьйлене, янгы агьлю яшав башлай.
1992-нчи йылдан бу гюнге ерли Дилбар Хасаева Адил Янгыюртдагъы орта школада загьмат дарсланы муаллими болуп чалыша. Яшланы оьзюню дарсларында загьматгъа къуршалмагъа, жамиятгъа пайдалы болуп оьсмеге уьйрете.
Татывлу агьлюде эки улан ва бир къыз тува. Яшлар бой сала, гёз алда оьсе, шону булан йыллар да гете. Оланы эки де уланы Исмайыл ва Юнус школа чагъындан берли де спортгъа къуршалалар, гьар тюрлю ярышларда алдынлы ерлени алып юрюйлер.
Уллу уланы Исмайыл, 2010-нчу йылда Адил Янгыюртдагъы орта школаны яхшы къыйматлагъа тамамлап, Новосибирск шагьардагъы Россияны МВД-сини ич асгерлени институтуна тюше. 2016-нчы йылда эсгерилген оьр охув ожакъны уьстюнлю кюйде тамамлай ва яш офицер оьзюню аслу борчун – Ватанын якълавгъа багъышлай.
Украинаны топурагъында хас асгер гьаракат башлангъанда, Россияны милли гвардиясыны капитаны Исмайыл Хасаев Донбасны халкъын миллетчилерден азат этивде ортакъчылыкъ эте. Къоркъув билмейген офицер Россияны Президенти Владимир Путинни Указына гёре, «Ватаныны алдындагъы лайыкълы къуллугъу» учун деген орденни 2-нчи даражалы медалы булан савгъатлангъан.
Бугюнлерде Исмайыл Хасаев ёлбашчылыкъ этеген бёлюк Саратов областны асгер бёлюклерини биринде ерлешген. Бугюн де Ватан чакъырса, ол сесленмеге гьазир.
Ону иниси Юнус да, агъасы йимик, ата юртундагъы школаны тамамлагъан сонг, 2016-нчы йылда агъасы охугъан Новосибирск шагьардагъы Россияны МВД-сини ич асгер институтуна тюше. 2021-нчи йылда ол да офицер чинге ес бола. Яш офицерни асгер бёлюкге белгилей. Узакъ заман да гетмей, белгили агьвалатлар башлана, Ватаныбызны алдында къоркъунчлукъ тува ва уллатасы Магьаммат Черивмурзаевни ёлун узатып, Юнус да хас асгер гьаракатгъа гете. Донбас ва Запорож областланы миллетчилерден тазалай, халкъгъа парахат яшав гелтирмеге къасткъыла. Юнус – старший лейтенант, ротаны командирини орнунбасары.
Мен Исмайылны ва Юнусну уллатасы Магьаммат Черивмурзаевни эсгерип гетгеним де негьакъ тюгюл. Ол Уллу Ватан давну йылларында 3-нчю Украина фронтгъа гиреген 620-нчы атышыв полкда къуллукъ этген. Оьзюню дав ёлдашлары булан ол Витебск ва Вильнюс шагьарланы эркин этип, шону булан савлай Прибалтиканы немис-фашистлерден тазалагъан, яралангъан. Яралары сав болуп, гене дав ёлдашларыны янына къайтгъан ва Уллу Уьстюнлюкню уллу сююнч булан къаршылагъан.
Арадан 80 йыллар гетип, ону къызыны авлетлери де шо йылларда хытаны тамуруна ерли юлкъунмагъан фашизм булан гене ябушувун узаталар. Уллатасы йимик олар да уьстюнлюк булан сав-саламат уьйлерине къайтажакъгъа инаналар.
– Бизин учун Уьстюнлюкню гюню – гьаман да лап да уллу байрам. Атабыз болмаса да, биз шо гюн жыйылабыз ва байрам гюнню ону савунда йимик къаршылайбыз, – деген эди 9 Майны гьакъында хабарлайгъанда Дилбар Хасаева. Шо вакътиде, арадан бираз гетип, оьзюню эки де уланы Исмайыл ва Юнус, атасы дав этген бойларда гене шо фашистлер булан ябушар деп ону эсине бир де гелмегендир.
«Мен уланларым булан оьктеммен, олар мени аркъа таявум. Гьали олагъа – бары да офицерлеге ва солдатлагъа савлай Ватаныбыз аркъа таягъан», – дей бугюн офицерлени анасы Дилбар Хасаева.
Дилбар йимик нечесе аналаны ва аталаны авлетлери булан оьктем болмагъа гьакъы бар. Олар яйны яллавунда гююп, къышны боранында уьшюп, явунгъа да, чарслы чакъгъа да къарамай, гьар гюн, гьар мюгьлет булан бизге уьстюнлюкню ювукълашдыралар. Бугюн хас асгер гьаракатда ортакъчылыкъ этеген гьар ананы авлети – игит. Олар булан савлай халкъыбыз оьктем, оланы тапгъан ва тарбиялагъан аналаны алдында баш иймек буса – гьар ватандашны борчу!
Герейхан ГЬАЖИЕВ,
бизин мухбирибиз.
СУРАТДА: Дилбар Хасаева – эки де уланы булан
