Россиягъа янгы къошулгъан республикаланы аманлыгъын сакъламакъ ва шондагъы орус халкъгъа вагьшилик этеген миллетчилени тамурундан юлкъуп ташламакъ учун хас асгер гьаракат юрюлегени 2 йылдан да артыкъ бола. Асгерчилер булан янаша шо республикаланы харлысызлыгъын якъламакъ учун дыгъар язып да,  гёнгюллю кюйде  де бизин республикадан кёп улан гетген. Шо гьаракат юрюлеген бойда дагъыстанлылар айрыча къоччакълыкъ гёрсетелер. Россияны Игити деген атны да биринчи бизин улан алды.

 

Хас асгер гьаракатда гёрсетген къоччакълыгъы учун къумукъ уланлагъа — темиравуллу Темирлан Абуталимовгъа ва уллубийавуллу Залибек Умаевге де Россияны Игити деген оьр атлар берилген. Эсгерилген гьаракатда къоччакълыкъ гёрсетгенлени, орденлер ва медаллар алгъанларыны, жанын бергенлени гьа­къында да биз газетни гьар номеринде язабыз.

Эндирейден шо гьаракатда 45 улан ортакъчылыкъ эте, шоланы кёплерини пачалыкъ савгъатлары да бар. Хас асгер гьаракатда ортакъчылыкъ этегенлени агьлюлерине бек тергев бериле. Эндирейге спорт комплексни ачылывуна багъышлангъан чарагъа гелген Дагъыстанны Башчысы Сергей Меликов да комплексни ачып ва айланып битгенден сонг биринчи сорашгъан адамлар – хас асгер гьаракатда яраланып къайтгъан Артур Салавов ва Залимхан Гьасанханов эди. «Сизге бакъгъан якъда не кемчилик ва етишмейген не бар?»,– деген соравуна эки де улан  жавапланмады, неге тюгюл де юртну башчысы Ирази Абсаламов олар хас асгер гьаракатгъа гетген биринчи гюнлерден тутуп агьлюлерин оьзюню тергевюню тюбюне алгъан.

Артур биринчи керен баргъан буса да, Залимхан Гьасанханов хас гьаракатгъа экинчи гезик барды. Биринчи гезик де ол яраланып къайтгъан эди. Гёрсетген игитлиги учун «За отвагу» деген медаль да булан савгъатлангъан. Нечик сорасам да савгъатны негер берилгенни айтмады. Мен англагъан кюйде, ол ал сыдраларда яшыртгъын гёз къаратывчу. Биринчи гезик ол хас асгер гьаракатда ортакъчылыкъ этегенде янында топ тюшюп яралангъан эди. Ону госпитальгъа гелтиргенде шонда да ракета тюшюп, бирдагъы да яраланды. Госпитальда ятып къолай болгъанда уьюне йиберилген эди. Узакъ да турмады, янгыдан гетди. Ол экинчи гезик Артур булан баргъан эди. Шолай бир дав гьаракатда экевю де яраланып, гьали къолай болгъанча уьйге йиберилген.

«Гьайыбызны этегени учун бары да къурумлагъа, айрокъда Сергей Алимовичге баракалла билдиребиз»,– дей уланлар. Оланы агьлюлерини янында да туруп, яшларындан сююнюп турагъан заманы эди, тек олар къолай болгъандокъ, Ватанын сакъламакъ учун янгыдан ёлдашларыны янына гетежегин айтдылар.

 

Бизин мухбирибиз.