Гьали – гьалилерде «Къаягент» деген пачалыкъ унитар предприятие загьмат тёгегенлер булан 3 йылгъа коллектив дыгъарлар байлады.
Язбаш – авлакъ ишлени къыстав вакътиси. Юзюм бавларда шпалерге ремонт этив булан бирге борлаланы гесив, байлав ишлер юрюле. Бир-бир участкаларда сугъарыв да оьтгериле. Гюзлюклерде де ишлер токътамай – авлакълагъа зараллы жанлагъа къаршы агъулу дарманлар себиле. Ишлени барышына да къарамайлы, мартны 14-нде «Къаягент» деген пачалыкъ унитар предприятиени жыйынлар оьтгерилеген залына коллективни бары да тармакъларыны бёлюклеринде загьмат тёгеген 94 ишчилени 25 вакили хозяйствону ёлбашчысы М. Алибековну, профсоюз комитетни председатели М. Сулеймановну гьисап берив докладларына тынглады.
М. Алибеков айтагъангъа гёре хозяйство 2023-нчю йылда юрт хозяйствону бары да тармакъларында яхшы натижалагъа етишген. Шолай, 44670 центнер юзюм оьсдюрюлген, 7410 центнер ашлыкълар къайтарылгъан. Гьайванчылар 676 центнер сют, 410 центнер эт, 350 центнер юн сатгъанлар. 2023-нчу йылда гьайванлар учун таман болур чакъы къатты емлер топлангъан. Уьстюнлюклеге Пирдавус Табтухованы, Шихбавмат Жалиловну, Дагьир Алавовну авлакъчылыкъ бригадаларыны коллективлери, Магьаммат Алибековну трактор бригадасыны механизаторлары айрыча уллу къошум этген. Предприятиени авлакъларында юрт хозяйство ишлер токътавсуз юрюлюп тура, къышлав кампания да уьстюнлю бара.
Директорну докладыны ахыры булан конференцияны делегатлары М. Сулеймановну докладына да тынгладылар. Ол аслу гьалда загьмат тёгегенлени социал шартларын яхшылашдырывда, ишлейген ерлеринде болдурулгъан онгайлыкъланы гьакъында айтды. Сонг гьисап беривлени жамы чыгъарылды. Жыйылгъанлар предприятиени администрациясыны ва профсоюз комитетни арасында байлангъан дыгъарны яшавгъа чыгъарылывуна тийишли къыймат бердилер.
Жыйында ортакъчылыкъ этген районну юрт хозяйство управлениесини баш касбучусу Абдулла Мустафаев хозяйствону ёлбашчысы М. Алибековну, профсоюз комитетни председатели М. Сулеймановну гьисап берив докладларына тындырыкълы тынглап, юзюмчюлюк, авлакъчылыкъ, гьайванчылыкъ тармакълардагъы гьаллагъа оьз къыйматын берди, гьисап берив вакътиде етишилген уьстюнлюклер гьакъда айта туруп, иш уьстде йиберилген кемчиликлени айрыча эсгерди, оланы алдын алывну ёлларын аян этди. Мисал учун, гьайванлагъа гьар йыл яхшы емлер гьазирлене. Амма савулагъан сютлени къадары артмай. 2023-нчю йылда гьар сыйырдан орта гьисапда 1186 литр сют савулгъан. Шо да республикадагъы орта натижалардан эсе аз.
Хозяйствону авлакълары гюзлюк чачывланы майданларын 1000 гектаргъа етишдирмеге имканлыкъ бере. Тек шо имканлыкълардан хозяйствону ёлбашчылары, авлакъчылар тюз пайдаланмай.
Юзюмчюлюкде ишлер макътардай. Бу йыл емиш береген бавланы гьар гектарындан орта гьисапда 89,7 центнер юзюм къайтарылгъан.
Сёйлевюню ахырында А. Мустафаев хозяйствону ёлбашчыларына, ишчилеге уьстюнлюклер ёрады, баш касбучуланы, бригадирлени янгы ва дагъы да оьр натижалагъа етишме чакъырды.
Дагъыстанны юрт хозяйство тармагъындагъы профсоюзланы республика комитетини председателини заместители Муртазали Муртазалиев оьзюню къысгъа сёйлевюнде «Къаягент» деген пачалыкъ унитар предприятие гьар тюрлю тармакъ-ларында етишген уьстюнлюклерине разилигин билдирди, гележекде оьрлюклер ёрады.
Конференцияны делегатлары 2024-2026-нчы йыллагъа гьазирленген янгы коллектив дыгъарны арив гёрдю ва къабул этдилер.
Магьамматрасул ИБРАГЬИМОВ,
Къаягент район.
