Март айны 8-нде,  ахшам вакъти Манас – Сергокъала ёлну 44-нчю чакъырымында болгъан хатабалагь Интернетни къоллавчуларыны арасында айрыча къарсалавлу  сесленивлени тувдурду.

 

Ёл ягъада машинини дёгерчеги тешилип, эр-къатын ва оланы 6 йыллыкъ къызы токътагъан болгъан. Шо мюгьлетде оланы уьчевюн де бек чалт гелеген  башгъа машин уруп йыкъгъан. Гечге таба жагьил къатынгиши азарханада оьлген, ону эри ва яшы да  бек авур яралангъанлар, врачлар олагъа болагъан кёмегин этмеге къарайлар.

Бу ожакъны  бирден уллу къайгъыгъа дёндюрген   машинни гьайдавчусу ич ишлени Сергокъала район бёлюгюню къуллукъчусу, полицияны майору болуп чыкъгъан. Шо гюн ол машинин эсирген кюйде гьайдай болгъан. Гьали полицейский тутулгъан, огъар къаршы уголовный иш ачылгъан ва район судну къарары булан ахтарывланы вакътисинде эки айгъа эркинликден магьрюм этилген.

Ахтарывчулар тергевлени башлагъан.

 

Алав АЛИЕВ