Аламгъа тезден абат алмагъа амал тапгъан буса да, тюбюне тюшмеге, себеплерин аян этип токъташдырмагъа буссагьат да инсанны толу кюйде гючю етмей турагъан гьайранлыкълар аз тюгюл. Шогъар бизин бир ерли мисалны эсге алып сёйлемекни оравлу гёремен. Неге тюгюл де, оьз заманында шогъар маълумат къуралларда онча тергев берилмеди. Мен Буйнакск районда чыгъагъан газетни редактору болуп ишлейгенде Къарамахи юртда себеплерин англап болар даражада тюгюл гьайран «агьвалат» болгъан эди. О гьакъда биз къысгъа маълумат берсек тюгюл, дагъы макъала да язмадыкъ, неге тюгюл шо бирев де англатып болмас йимик иш эди.
Бу гьайранлыкъны авур «намусу» Жанарслан Закаевге де тюшген эди. Ол о йыллар Къадар бойда ерлешген от тюшювге къаршы иш юрютеген охрананы начальниги эди. Ол берген маълуматлагъа гёре, Жанарслан Аминат деген къыз турагъан агьлюге, бинагъа гечеси, гюню булан гёз къаравул этип тургъан. Неге тюгюл, ол олтургъан, тургъан ерге ёкъ ерден от тюше болгъан. Башлап буланы гётермелери яллагъан, артда буса уьйню ичиндеги диван, тёшеклер, хали-халча янма башлай. Сонг савлай уьюне от тюше. Ата-ана, тухум-къардашлар не этегенни билмей къыйнала. Болуп турагъан бу балагьлы гьайранлыкъны гьакъында Жанарслан бары да къурумлагъа билдире, бир чара гёрюп кёмек этмекни тилей…
Не этегенни билмей, артда Карим ва Пирзанат Мирзаевлер савлай агьлюсю булан хоншу юртдагъы къардашыны уьюне гёчелер. Онда да айлангъан сайын от къабуна. Артда буланы юрт советден къалгъан бош уьйню ичине гийирип сакъламагъа къарайлар. Онда да от янывлар токътамай. Ва гьатта уьйдеги гьар-бир зат оьзлюгюнден ерлеринден тербене, ава, сына. Сонг да охувчу чагъындагъы Аминатны энглери аз-аз тырналып чыгъа гечеден эртенге, яягъында хачны гёлеминде къызыл гьызлы сурат болуп да гёрюне. Ону чачлары къыркъгъан йимик болуп башындан оьзлюгюнден тюшюп тая. Оьзюне не болажакъны, не ерде къачан от янажакъны алданокъ айта.
Ахырда не этегенни билмей, Жанарслан Дагъыстан МЧС-ни де ортакъчылыгъы булан яшны ва ону анасын, анасыны къызкъардашын да алып Москвагъа телевидениеге бара. Алданокъ сёйлешип, шонда белгили 4 гёзбавчу (экстрасенс) булан ёлугъа. Экстрасенслеге булар бу ишни нечик болагъанын иш этип айтмайлар. Студиягъа Аминатны ва ону анасыны къызкъардашы Патиматны янына Эскандер Жин деген экстрасенс ювукъ гелип олтура. Уллулардан изну тилеп, Эскандер Аминатны къол аясын оьзюню онг аясына къаплап сала. Оьзюню сол къолун шогъар ювукъ алып гелип, астаракъ айландыра. «Шо заман Аминат эшитдиреген кюйде «Мени къолум уьшюп бара», – дей. Эскендер буса: «Бу яшдан гелеген яныв мени аяларымны бишире», – дей.
Бир арада Эскандер ерге гёзлерин тигип гьалны суратлап сёйлейгенде, Аминат, анасына аста бурулуп: «Бу гиши магъа ичимден буйрукъ этеген гючлер (жинлер) булан сёйлейгенни гёремен», – деп талчыгъып йибере. Гьасили, Эскандер бу къызгъа нечик буса да болма имканлы гьар затны алданокъ сезмеге, айтып бермеге яшыртгъын кёп уллу гюч берилгенни англата. Олай гюч бизин бирибизде де ёкъ. Эгер кюйлеп бажарса гележекде Аминат адамланы аврувлардан сав этмеге де болажакъ», – дей Эскандер.
Гьасили, дёрт эсктрасенсден Эскандер де, Рафаэль дегени де къызъяшны гьалын, ону ичиндеги илгьамлы гючню къолай сезген ва гертиге гелишеген баянлыкълар да берген.
Артда анасы Пирзанат Эскандерге оьзюню яшын шо муъжизат сынавлардан, инживлерден къутултма кюй ёкъму деп къаныгъа.
Жанарслан хабарлагъаны йимик, Эскандер айта: «Мен яш булан бирдагъы да къатнайым», – деп. Шо ёлугъувну барышында Эскандер гиччи хынжалны къындан сувуруп, шыбышлайгъанда йимик бир затлар охума башлай. Оьзюню баянлыгъын тёшлей туруп, Эскандер Жин «7-8 ай яшгъа дагъы бир балагь да гелмежек. Шондан сонг бир зат да болмаса, Аминат оьзю де дагъы инжинмежек, сизин де инжитмежек» деген.
Бу гьайран иш болгъанлы 10 йылгъа ювукъ бола. Болса да бу ишни тамашасы мени эсимден таймай тура эди.
Муна, гетген йыл Буйнакск районгъа 100 йыл битегенине байлавлу уллу байрам болду. Шо мажлисде мен ювугъум Жанарслангъа урунуп ёлугъуп къалдым. Салам-каламдан сонг мен огъар «Баягъы къарамахили къыз не болду?» деп сорадым. Ол шо Москвадагъы телевидениедеги ёлугъувдан сонг Аминат инживлерден къутулду. От да дагъы къабунмайгъан болду, Аминат эрге баргъанны, ону эки бир аламат авлетлери барны да сююне туруп айтды.
Бу да дюньяны сыралы тамашалыкъларыны бирисидир.. Шолай затланы эшитгенде биз гёрмесек инанмай да къоябыз. Менде о гьалланы гьакъында Жанарслан магъа йиберген геп-герти видео буссагьат да бар. Шулай гьалланы ва дюньядагъы башгъа муъжизатланы гьакъында гертини язып халкъгъа англатмакъдан бир зарал да ёкъ деп гьисап этемен.
Тюзю, «Ёлдашны» бир бетинде адамны гьайрангъа къалдырагъан дюнья, табиат исбарлыкъланы гьакъында суратлары да булан къысгъа макъалалар да чыгъып турду. Шоланы редакцияны къуллукъчусу Хадижат Жанболатова эринмей, нече де бажарывлу кюйде юрюте эди. Ол гечинген сонг шо сагьифа «бошады». Тек шону янгыдан онгарагъан кюй тарыкъ эди. Мен де шу «узун» макъаланы эсгерилген къужурлу, маъналы шо бетни янгыртывну баш сеси болмасмы экен деген умут булан яздым.
Абдулла ЗАЛИМХАНОВ.
