12-нчи мартда Дагъыстанны Халкъ Жыйыныны председатели Завур Аскендеров яшёрюмлени парламентини ортакъчылары булан ёлукъду.
Завур Асевович оьзюню сёйлевюнде Россияны Президенти В. Путинни сиптеси булан 2024-нчю йылда «Россияны яшёрюмлери» деген милли проект ачылагъанны гьакъында айтды. Шо аслу гьалда яш наслуну якълавгъа ва оланы оьсювюне багъышланажакъ.
– Шо яндан Дагъыстан яшёрюмлени оьсювюне бек тергев эте ва уьлкени даражасында алгъанда биз ал сыдралардабыз, – дей З.Аскендеров. – Бизин республикада 35 йылына чыкъмагъан яшёрюмлени санаву биринчи ерде деп айтма ярай. Бизде «Биринчилени гьаракаты» деген чара да бек яхшы ишлей. Яш наслу берилген имканлыкъдан пайдаланып, оьзлер ушатагъан тармакъларда оьсме болалар ва гележекде жамият учун пайдалы ишлени сайлайлар.
Дыгъыстанны Халкъ Жыйынында яшёрюмлерини парламенти хас асгер гьаракатда ортакъчылыкъ этегенлеге ва оланы агьлюлерине кёмек этивде къасткъылагъаны гьакъда да айтылды. Шо парламентни ёлбашчысы Хочбар Баркаев айтагъан кюйде, яшлар 50-ден де артыкъ тюрлю чаралар оьтгерген, кёп санавдагъы форумларда ортакъчылыкъ этген, грантлар алагъан конкурсланы утгъан ва шоланы яшавгъа чыгъаргъан.
Завур Аскендеров ёлугъувну жамын чыгъара туруп, яшёрюмлер республикада юрюлеген бары да ишлерде ортакъчылыкъ этме герекни, оьзлени нечик даражада юрютегенинден, олар алажакъ билимлерден ва шону пайдаландыражакъ кююнден Дагъыстанны гележеги гьасил экенни унутма ярамайгъанны айтды.
Бизин мухбирибиз.
