Бу йыл март айны 12-нчи гюнюнде Магьачкъалада Расул Гьамзатовну атындагъы республика милли китапхананы залында ДР-ни юрт хозяйство ва сурсат министерлигини коллегиясыны генглешген жыйыны оьтгерилди. Жыйында регионну агропромышленный тармагъыны оьсювюне къуллукъ этеген бары да пачалыкъ къурумланы, районланы юрт хозяйство управлениелерини башчылары ортакъчылыкъ этди. Жыйынны Дагъыстанны Гьукуматыны Председатели Абдулмуслим Абдулмуслимов ачды ва юрютдю.
– Дагъыстан аграр республика, – деп башлады оьзюню сёзюн Абдулмуслим Мугьутдинович. – Шону учун Россияны Президенти ва Дагъыстанны Башчысы республикабызны юрт хозяйство къуллукъчуларыны алдына жаваплы борчлар да сала. Бизге де айлана якъдагъы ич ва тыш талапланы гьисапгъа алып сурсат аманлыкъ учун юрюлеген гьаракатда гёрмекли натижалагъа етишмек къала. Оьтген йыл дагъыстанлы юрт хозяйство продукция оьсдюрюв булан машгъул болагъан къурумлар ва айрыча адамлар умуми кюйде алгъанда 1,5 миллион тон овощлар, 360 минг тон картоп, 282, 7 минг тон юзюм, 200 минг тон емишлер, 150 минг тон чалтик, 30 минг тон эт алгъан. Шо да Савлай Россияда лап да гёрмекли натижалар болуп токътай. 2024-нчю йылда да, етишилген натижалар булан дазуланмай, юрт хозяйствону оьсдюрювге айрыча тергев берилежек. Юрт хозяйство продукция оьсдюрюв булан машгъул болагъан бажарывлу тайпалар пачалыкъны янындан да материал ва ругь якъдан иштагьландырылажакъ.
Алда токътагъан масъалаланы агьамиятлылыгъын гьисапгъа алмай къоймагъа ярамай. Юрт хозяйство агьамияты булангъы топуракъланы асувлу кюйде пайдаландырыв булан янаша болдурулгъан продукцияны ишлетеген, сакълавгъа салагъан ва сатывгъа чыгъарагъан логистика центрланы, банк къуллукъланы артдырывгъа да гележекде тергев артса тюгюл, кем болмажакъ. Шону учун республикабызны агропромышленный тармагъы булан байлавлукъда иш гёреген алимлеге де илмуну имканлыкъларын генг кюйде къолламагъа таклиф этилине. Неге десегиз, илмуну сынав булангъы байлавлугъу юрт хозяйствону оьсдюрювге ёллар гёрсете.
Коллегияны генглешген жыйынында Дагъыстанны юрт хозяйство ва сурсат министри Мухтарбий Ажеков арагъа салынгъан сурсат аманлыкъны агьамиятлы масъаласына гёре доклад этди. Шонда ол оьтген йылны натижалары ва гележекге байлавлу белгиленген борчлар гьакъда толу кюйде баянлыкъ. берди. Докладдан сонг чыгъып сёйлеген ёлдашлар регионну агропромышленный тармагъыны алдында токътагъан борчланы ва шолай да масъалаланы гьакъында оьз пикруларын малим этди.
Ахырында агропромышленный тармакъда чалышагъан оьз ишини усталары башгъа-башгъа даражадагъы савгъатлар булан иштагьландырылды.
Жыйында гётерилген агьамиятлы масъалалагъа байлавлу болуп гележекде генглешген макъала язма умут этиле.
Къ. КЪАРАЕВ.
