Тюнегюн Магьачкъаладагъы милли китапханада Пачалыкъ Думаны депутаты Солтан Гьамзаевни ерли журналистлер булан ёлугъуву оьтгерилди. Ёлугъувну ача труп, Дагъыстанны маълумат ва печат агентлигини ёлбашчысы Абдуразакъ Жамалутдинов байрамны алдында маълумат къуралланы вакиллери булан ёлукъма чола тапгъаны учун депутатгъа баракалла билдирди.

 

– Бугюнлерде Дагъыс­танны журналистлерини союзу къурулгъанлы 65 йыл бите ва шо тармакъда кёп санавдагъы къатынгишилер ишлей, – дей С.Гьамзаев. -Байрамларыгъыз булан къутлайман. Бугюнлерде журналистлени бойнуна кёп намус тюшген ва оланы тюз ёлда чечивден кёп зат гьасил бола. Язмакъ учун масъалалар кёп. Гьали яшёрюмлени терс ёлгъа салма къарайгъан нечакъы гючлер бар. Гьали-гьалилерде Россияны Президентини Федерал Жыйынгъа этген Чакъы­рывунда “Молодежь” ва “Кадры” деген айрыча милли программалар къабул этилежекни айтды. Демек, гележек 6 йылгъа этилме герек ишлени гёрсетди ва аян этди. Милли проектлени 2030-нчу йыллар болгъанча узатылагъаны да яхшы хабар. Билдирилген санкциялагъа къарамай, экономикабыз артып тура. Муна, шулай затлаты гьакъында язма герек. Тезде Россияны Президентин сайлавлар оьтгерилежек, шонда да гьар адам оьзюню ватандашлыкъ борчун кютме герек. Журналистлерден гьасил болагъан затны этме тюше.

Сонг да Солтан Солтанбиевич жыйылгъанланы соравларына жаваплар да берди.

Соравларда аслу гьалда ДГУ-да журналистлер гьазирлейген факультетде бюджет ерлер ёкълугъу, ана тиллеге тергев ёкъну, китаплар етишмейгени, журналистлени алапалары осал экени де арагъа чыкъды. Соравланы барына да толу жаваплар къайтарылды, бирлерин чечмек учун язып алып.

Жыйынны ахырында ол маълумат къуралларда кёп йыллар загьмат тёкген къатынгишилеге баракалла кагъызлар ва гюл байламлар берди. Савгъатлангъанланы арасында «Ёлдаш» газетни жаваплы секретары Нюрсюв Албасханова да бар.

 

Бизин мухбирибиз.