Москвадагъы В.И.Кулаковну атын юрютеген медицина центрда Марат ва Юлдуз Салаватовлагъа бирге 4 яш тувгъан деп башлап Россияны Пачалыкъ Думасыны депутаты Бийсолтан Гьамзаев оьзюню Телеграм каналында язып чыкъгъан эди. Къайда барса да къумукълар деп ойлашып къалгъан эдим.
4-нчю мартда Россияда аслу деп гьисапланагъан 1-нчи каналдан янгылыкъларда шо яшланы больницадан чыгъарагъанын гёрсетгенде, шолар къумукълар экенге мекенли тюшюндюм. Уьстевюне, барысы да таныйгъанлар болуп да чыкъдылар. Яшланы атасы Марат Ботаюртда танывлу Салаватовланы тухумуну наслусу, анасы – Россияны Игити, 1945-нчи йылда Рейхстаггъа байракъ къакъгъан Абдулгьаким Исмайыловну уланы Солтансайитни ва Марьямны къызы Юлдуз болуп чыкъды. Олар агьлюсю булан Москвада яшайгъанлы 5 йыл бола. Оланы къутлай туруп, яшланы гьалын сорайман.
–Яшланы медицина центрдан чыгъарагъанда Москвагъа кёп къардаш жыйылып бардыкъ, – дей къызны анасы Марьям. – Еринде де кёп адам жыйылгъан эди. Бу центрда 4 яш бирге тувагъан гезиклер аз дей, оьтген 15 йылны ичинде – бу дёртюнчю гезик. 4 яш бирге 700 минг керенден бир бола дей. Шо да бизин къызгъа къаршы болгъан. Яшлар уьйде, оланы гьалы яхшы.
Марьям да яшлагъа къарайгъан врач, кёп йыллар Хасавюртдагъы больницада ишлеп тура.
Зенг этип Юлдузну да къутлайман.
– Бу – Аллагьутаала берген уллу савгъат, – уьч яшыбыз болар деп тура эдик, бир гюнден 6 яшыбыз болуп къалды, деп кюлей ол. – Башлап 3 яш дей эдилер, сонг дёрт болду. Бек арив къарадылар. Центрны директору Геннадий Сухих де гелип къарай эди. Чыгъагъан гюн гьар яшны ол оьзю тергеди.
Яшлагъа атланы уллу авлетлери такъгъан: Камила, Милана, Айла ва Данил. Оланы авурлугъу 2 килодан аз, тек гьар гюн астаракъ булан авурлукъ къошула.
Къатынгишилени байрамыны алдында Салаватовланы агьлюсюне эсде ёкъ савгъат болгъан. Шолай савгъатлар бу агьлюге дагъы да кёп болсун, яшлар да эсен-аман оьссюнлер!
Г. БЕК.
