Артдагъы йылларда айлана якъда артып тербейген талапланы гьисапгъа алып, Магьачкъаланы ва Каспийск шагьарланы арасында ерлешген СССР-ни  эки керен Игити Аметхан Солтанны атындагъы «Уьйташ» аэропортда ярашдырыв-янгыртыв ишлер генг кюйде оьтгерилегени ачыкъдан гёрюне. Демек, гьава гемелени къонушу халкъара оьлчевюнде генглешдириле ва учагъан транспортдан пайдаланагъан къоллавчулар учун гьар тюрлю онгайлы къуллукълар болдурула.

 

Гьали-гьалилерде эсгерилген бойда ишчи сапары булан ДР-ни Гьукуматыны комиссиясыны ортакъчылары болду. Олар аэропортну янгыртывгъа байлавлу оьтгерилеген экинчи гезигинде гёз алгъа тутулгъан ишлени барышына тергевюн бакъдырды. ДР-ни транспорт, энергетика ва къурулуш министерликлерини башчылары республика бюджетден айырылгъан харжлар некъадар асувлу кюйде пайдаландырылагъаны булан ювукъдан таныш болдулар.

Белгили болгъан кюйде, къурулуш ишлер Дагъыстанны Гьукуматыны ва шолай да «Магьачкъала» халкъара аэропорт» деген акционер жамиятны арасында болгъан разилешивге кюрчюленип дыгъарны шартларына гёре оьз болжалларында сан яны булан оьтгерилегени аян этилди.

– Эсгерилген проект  учун РФ-ни  Гьукуматыны къарарына гёре республика ва федерал бюджетлерден берилеген кредитлени оьлчевлерин  кемитмек мурат булан 515 миллион харж айырылгъан, – деди ДР-ни Гьукуматыны Председатели Абдулмуслим Абдулмуслимов, – Республика бюджетден гёрсетилген акъча маяланы асувлу кюйде пайдаландырывну натижасында салынагъан электрик линияланы ва шолай да жамият транспорт учун токътайгъан ерлени ва оьзге тюрлю онгайлы къуллукъланы бу йылны ахырларына таба пайдаландырывгъа бермеге умут этилине. Шону учун агьамиятлы проектде алгъа салынгъан борчланы яшавгъа чыгъарывну барышы тергевден таймай.

Къоллавчулар учун гьава транспортда гьар тюрлю онгайлыкъланы болдурув  юклени ва пассажирлени къадарын- санавун артдырмагъа имканлыкълар яратыла. 2023-нчю йылда Магьачкъала аэропортда пассажирлени къуллукъларын кютюв 12 процентге артгъан.

Дагъы да ачыкъ этип айтсакъ, гьава транспортну къуллукъларындан 2,8 миллион къоллавчу-пассажир пайдалангъан. Уьстевюне, оьтген йыл 3,4 минг тон гьар тюрлю юклер ва шолай да почта гелтирилген.

Гьава гемелер уьстге гётерилеген ва шолай да къонагъан ёллар халкъара оьлчевюню талапларына жавап береген даражада янгыртылгъаны  алда токътагъан борчланы уьстюнлю кюйде яшавгъа чыгъармагъа кёмек эте.

 

Къ. КЪАЗАКЪМУРЗАЕВ.