Магьачкъалада «Дослукъну» уьюнде Къатынланы халкъара гюнюне багъышлангъан шатлы жыйында Дагъыстан Республиканы Башчысы къатынлагъа пачалыкъ савгъатлар тапшурду.
Пачалыкъ савгъатлагъа лайыкълы болгъанланы арасында кёп яшлы аналар, хас асгер агьвалатда ортакъчылыкъ этегенлени агьлюлери, ДР-ни жамият чалышыв-чулары, маданият, билим берив тармакъны къуллукъчулары ва илму тармакъны чалышывчулары бар эди.
Сергей Меликов эсгерилген шатлы жыйынны ача туруп, къатынгишилени байрам гюню булан къутлады, олар гьар тюрлю тармакъда етишген уьстюнлюклени эсгере туруп, булай деди:
– Сиз уьй къуллукъланы ва касбугъузну бир вакътини ичинде юрюте туруп, уьлгюлю уьягьлю, гьайлы, тергевлю ва сююмлю аналар кюйде къалагъаныгъыз айрокъда къыйматлы. Биз, озокъда, сизин булан оьктем болабыз. Республиканы яшавлукъ-экономика оьсювюне этеген уллу къошумугъуз учун баракалла. Бугюн оьзлени къайратлы загьматы булан Дагъыстанны, Россияны гючлю этеген кёп къатынгишилени атлары эсгерилежек. Сизге инанывугъуз, якълавугъуз ва гьай этивюгюз учун баракалла билдиребиз.
Шатлы жыйында «Дагъыстан Республиканы алдында къуллугъу учун» деген орден 19 яшны сакълайгъан опекун Зада Макъсутовагъа, агьлюсюнде 10-ар яшы бар Мадинат Шагьболатовагъа ва Асият Дибировагъа тапшурулду.
Амет-Хан Солтанны атындагъы медаль яшёрюмлени патриот ругьда тарбиялаву учун хас асгер гьаракатны ортакъчыларыны ювукъ къардашларына ва асгердегилеге кёмек этеген къатынлагъа берилди. Оланы арасында Мегьрибан Муслимова, Патимат Пайзуллаева, Умужат Хириясулмагьамматова ва Маржи Ильясова бар.
Патимат Пайзуллаева илму ва жамият чалышыв булан машгъул, шолай да ол – «Они сражаются за Родину» деген китапны автору ва «Дети героев, отдавших жизнь за Родину» деген выставканы къурувчусу.
Умужат Хириясулмагьамматова хас асгер гьаракат башлангъанлы, оьзюню опуракъ тигеген устаханасында асгер къуллукъчулар учун хас опуракълар тиге. Ол хас асгер гьаракат башлангъанлы, 14 минг опуракъ тигип бакъдыргъан.
Респуликаны Башчысы билим берив, медицина, маданият ва инчесаният тармакъларда чалышагъан къатынгишилеге де пачалыкъ савгъатлар тапшурду. Олагъа «ДР-ни ат къазангъан илму къуллукъчусу», «ДР-ни ат къазангъан артисти», «ДР-ни ат къазангъан врачы», «ДР-ни пачалыкъ къуллугъуну ат къазангъан къуллукъчусу» деген ва башгъа гьюрметли атлар берилди.
Патимат БЕКЕЕВА.
