Бу жумада Дагъыстанны сайлав комиссиясыны председатели Магьаммат Дибиров ДР-ни Жамият палатасы да Дагъыстан пачалыкъ университетни юридический факультети оьтгерген жыйында ортакъчылыкъ этди. Шонда сёйлей туруп, ол Россияны Президентин сайлавланы гьакъында англатыв берди ва соравлагъа жаваплар къайтарды.
– Президентге тавуш берив 15, 16 ва 17-нчи мартда оьтгерилежек, бугюнлерде комиссияланы ортакъчылары англатыв ишлер булан машгъул. – деди М. Дибиров. – Тарыкълы маълуматланы къайсы ватандаш да эркин кюйде алма бола. Президентге 4 кандидат бар. Сайлавлар 54 территориядагъы 1862 участкада юрюлежек. Комиссияларда 14 минг адам ортакъчылыкъ эте.
М. Дибиров билдирген кюйде, сайлавларда ортакъчылыкъ этмеге деп 2024-нчю йылны башына 1 715 547 адам гьисапгъа алынгъан. 688 сайлав участкагъа видеокамералар салынгъан, сайлав участкалагъа гелип болмайгъанлар учун ватандаш борчун уьйде кютмекге де имканлыкълар болдурулгъан.
Сёйлевлерден сонг М. Дибиров жыйылгъанланы соравларына жаваплар да берди.
Бизин маълумат.
