«Дагъыстан» деген республика пачалыкъ телекомпания «Сёйлеме ихтияр бериле» деген ток-шоуну гёрсетме башлагъанлы, бир нече йыл бола. Шо вакътини ичинде эсгерилген программаны юрютеген Ульяна Мукайилова гьар тюрлю масъалаланы гётермеге къаст эте. Бу программада гьар тюрлю тармакъланы вакиллери ортакъчылыкъ эте ва бир-бир темалар бизин республиканы ватандашлары учун, балики, тамаша тиедир. Тек «Сёйлеме ихтияр береген» программа къаравчуланы сюювюн къазангъан.
Алдагъы гюнлерде буса Ульяна Мукайилова гезикли программаны февраль айны 21-нде белгиленеген Ана тиллени халкъара гюнюне багъышлагъан эди. Шонда мен де ортакъчылыкъ этдим. Башлап РГВК-ны студиясыны алдында жыйылгъанланы санавуна гёре, мунда не программа болур деген ой гелсе де, ону юрютеген Ульяна Мукайилова бажарывлу журналист экенине мюкюр болдум. Программада шагьар ва юрт школаланы ана тил ва адабият дарсланы юрютеген муаллимлери, охувчу яшлар, жамият чалышывчулар, милли тиллерде чыгъагъан газетлени вакиллери, йыравлар ва башгъалар ортакъчылыкъ этди. Ульяна Мукайилова программаны ортакъчыларыны кёбюсюне «Ана тил сизин учун недир?» деген соравну бере эди. Шо соравгъа башлап бизин республиканы Ногъай районундан гелген «Дослар ТВ» деген ногъай интернет телевидениени кюрчюсюн салгъан ва директору болуп чалышагъан Даниял Исакъаев жавап берди.
Программада Дагъыстан тиллерде сёзлюклени Интернет ва яшлар учун ана тиллени оюн къайдада уьйретеген чараланы автору, программист Завур Агъамов, Дагъыстан тиллеге белгили мультфильмлени гёчюрюп чыгъаргъан «Джигит ТВ» компанияны вакили Имран Гьюсейнов, «Замана» деген дарги тилде чыгъагъан газетни мухбири, язывчу Муъминат Татаева ва башгъалар ортакъчылыкъ этди. Олар гьариси ана тилини оьсювю учун этеген ишлени гьакъында хабарлады. Мен де оьзюмню янымдан къумукъ тил Дагъыстанда, Темиркъазыкъ Кавказда ва бютюндюньяда тутгъан ерин эсгердим ва газетни гьакъында хабарларым.
Патимат БЕКЕЕВА.
