Термез шагьарны ювугъундагъы Амударья оьзенден салынгъан эки де уьлкени дазу боюндагъы кёпюрден совет асгерлени ахырынчы асгер бёлюклери оьтгенли, арадан 35 йыл гетген. Шолайлыкъда, билдирилмей башлангъан Афгъан давгъа ахыр салынды.
Он йылны узагъында шо давну ёллары булан уьч мингден де артыкъ дагъыстанлы оьтген. Жанлары къыйылгъан воин-интернационалистлени атлары олагъа салынгъан мемориалларда даимлешдирилген, орамлагъа, школалагъа берилип, озокъда, бизин юреклерде де сакълангъан. Асгер къуллукъчулар йимик, ватандаш касбуланы есилери де: муаллимлер ва врачлар, аграномлар ва архитекторлар, геологлар ва байлавлукъ тармакъны къуллукъчулары, журналистлер ва къурувчулар оьзлени борчларын къоччакъ кюйде кютюп турду. Бугюн биз янгыз «афгъанлыланы» тюгюл, дюньяда болуп гетген савутлу пелекетлерде ортакъчылыкъ этип, Ватангъа бакъгъан якъдагъы гьатсыз сюювюнден къайры да, оьзлени ойлашмайлы, асгерлик къоччакълыкъны уьлгюлерин гёрсетген, дав майданда табылып гелгенлени барысын да эсге алабыз.
Гьюрметли воин-интернационалистлер, дав майданда къардашлыкъны мердешлерин сакълагъаныгъыз ва парахатлыкъны герти багьасын кимден де яхшы билегенигиз учун сизин алдыгъызда башларыбызны иебиз. Бугюнлерде сизин кёплеригиз асгер къуллукъчуланы яш наслусун гьазир этивде, жагьиллени патриот ругьда тарбиялавда мекенли къошум этип тура. Бирлеригиз чи хас асгер гьаракатгъа къуршалып, гене де дав майдангъа гетгенсиз. Абдуллаев Зиявутдин Алиболатович, Магьамматов Магьаммат Асгьабалиевич ва дагъы да кёп оьзгелерини сынаву, асгер къуллукъда топлангъан билимлери бек агьамиятлы, игитлиги буса оьзгелеге уьлгю болуп токътайгъанны исбатлай.
Сизин гьаригизге айрыча яхшы савлукъ, ругьугъузгъа жагьлыкъ, агьлюлеригизде татывлукъ ёрайман.
Дагъыстан Республиканы
Башчысы С. МЕЛИКОВ.
