Бабаюрт районлу прапорщик Расул Зубакъовгъа Ватанны алдында борчун кютегенде гёрсетген къоччакълыгъы учун «Дагъыстанны халкъ игити» деген сыйлы ат берилген.
Расул Зубакъов хыйлы заман Абхазстан Республикасында парахатлыкъны якълайгъан асгер бёлюгюнде къуллукъ этеген вакътиде гёрсетген игитлиги саялы, шо республиканы пачалыкъ савгъатына да лайыкълы болгъан.
Хас асгер гьаракат башлангъан гюнлерден тутуп, Расул Зубакъов Донбасны халкъын миллетчилерден якълап, оьзюню ёлдашларын ругьландырып юрюген ва яралангъанлагъа кёмек этген. Хас асгер гьаракатны барышында гёрсетген къоччакълыгъы ва игитлиги саялы уьлкебизни Президенти В.В.Путинни Указы булан Расул Зубакъов Жуковну атындагъы медаль булан савгъатлангъан.
Хас асгер гьаракатдагъы командировкасыны болжалы битгенде, Р. Зубакъов къуллукъ этеген бёлюк Къарабахгъа йиберилген. Ол бугюнлерде де шонда къуллукъ эте.
Гетген йыл май айны ахырында Расул Зубакъовгъа Россияны Оборона министри генерал Сергей Шойгуну буйругъуна гёре «Парахатлыкъны болдурув гьаракатны ортакъчысына» деген медаль, олай да, Россия Федерацияны Савутлу Гючлерини асгер автомобилистлени гюнюню 113 йыллыгъына байлавлу болуп, гьюрметлев грамота тапшурулгъан.
Гетген йыл язда Расул Зубакъов парахатлыкъны болдурув гьаракатны барышында гёрсетген къоччакълыгъы учун Россияны Къарабахдагъы асгерчилерини командую-щийи генерал-полковник Александр Ленцовну буйругъуна гёре «Къарабахда парахатлыкъ болдурувда ортакъчылыкъ этгени саялы» деген медаль булан сав-гъатлангъан.
Шондан къайры да, Расулгъа «Кавказда къуллукъ этгени саялы», «Яяв асгерде къуллукъ этегенде гёрсетген игитлиги саялы», «Абхазстан Республикасыны оборона министерлигине 25 йыл» деген ва оьзге юбилей медаллар берилген.
«Игитлени келпетлери» деген программаны яшавгъа чыгъарывда Расул Зубакъов тамамлагъан Бабаюртдагъы А.Арзулумовну атындагъы бир номерли орта школаны тамында огъар багъышлангъан сурат баннер илинген, «Игитни партасы» да салынгъан.
Расул Зубакъовгъа тапшурулгъан «Дагъыстанны Халкъ игити» деген савгъат республиканы кёп миллетли халкъыны алдында гёрсетген къоччакълыгъы саялы «Аявлу Дагъыстан» деген гьаракатыны хас комиссиясыны къарарына гёре берилгенни де эсгермеге сюебиз.
Бабаюрт райондан Украина бойда юрюлеген хас асгер гьаракатны ортакъ-чыларындан бешевю Дагъыстанны Халкъ игитлери болгъан.
Герейхан ГЬАЖИЕВ,
оьз мухбирибиз.
СУРАТДА: Расул Зубакъов.
