Магьамматрасул ва Азинат Загьировлар бири-бирине табушуп татывлу уьягьлю болуп яшай ва жагьил чагъындан тутуп къысматларын асгер бёлюкде къуллукъ этив булан байлагъанлар.
Магьамматрасул Буйнакск шагьарда школаны охуп битдиргенден сонг 1975-1977-нчи йылларда Азербайжан Республиканы о замангъы Кировобад (гьалиги Гянжа) шагьарында гьава десант асгер бёлюкде къуллукъ этген. 1982-нчи йылда ол Буйнакскиде ерлешген артиллерия дивизионда старший техник болуп ишлеме башлай. Эки мингинчи йылда ол Чечен Республикада юрюлген дав гьаракатда ортакъчылыкъ эте, 2002-нчи йыл асгер уьйренивлени вакътисинде ону сол билеги зараллана. Магьамматрасул Загьиров 2004-нчю йылдан бери якъгъа пенсиягъа чыгъып ял ала.
Буйнакскидеги медицина училищени битдирген уьягьлюсю Азинат да Буй-накскидеги асгер бригаданы управлениесиндеги байлавлукъ бёлюкню медпунктуну начальниги болуп, старший прапорщикни чинында 16 йылгъа ювукъ къуллукъ эте ва 2010-нчу йылда пенсиягъа чыгъа.
Магьамматрасул ва Азинат Россияны асгер бёлюклеринде къуллукъ этивню гьюрметли ветеранлары.
Алма терегинден ари тюшмей
Асгер къуллукъчуланы татывлу ва берекетли агьлюсюнде тувуп оьсген авлетлер; уланы Арсен булан къызы Бурлият да олардан уьлгю алып яшавларын асгерде къуллукъ этив булан тыгъыс кюйде байлама токъташалар.
Арсен Загьиров 1982-нчи йылны сентябрь айында тувгъан. Халимбекавул юртдагъы орта школаны охуп битдирген сонг ол Буйнакск шагьарда сапёрланы гьазирлейген бёлюкде асгер къуллугъун кютме башлагъан. Арадан 3 айлар гетип ол ерли бёлюкде контракт байлай ва мекенли асгер къуллукъчу болуп иш юрюте. 2003-нчю йыл Арсен Рязан шагьардагъы оьр охув ожакъда прапорщиклени йыллыкъ курсларын битдире. 2022-нчи йылны февраль айындан башлап, старший прапорщик Арсен Загьиров айры батальонну старший техниги гьисапда Украина бойда юрюлеген хас асгер гьаракатда ортакъчылыкъ эте. Ол оьзюню асгер ва ватандашлыкъ борчларына толу жавапчылыкъ гьис булан янашагъан къоччакъ уланланы бириси.
Таланы гюлю таза болур
Магьамматрасулну ва Азинатны къызы Бурлият 1990-нчы йылны 20-нчы августунда тувгъан. Халимбекавулдагъы орта школаны 9 класын тамамлагъан сонг ол Буйнакскидеги медучилищеде охуп фельдшер касбугъа ес бола. Башлапгъы вакътилерде Краснодар шагьардагъы поликлиникаланы бирисинде медсестра болуп 2015-нчи йыл болгъунча ишлей, касбусуну терен сырларына тюшюне. Бурлият Ростовдагъы асгер госпитальны янында айрыча ачылып иш гёреген хас тапшурувланы кютеген медицина бёлюкге ишлеме йибериле. Новочеркасск шагьарда реанимация бёлюкде медсестраны къуллукъларын кюте туруп ону янгы къошулгъан агьлюсю булан бирге Шалидеги дивизияда къуллукъ этме чыгъаралар. Агьлюсю Владислав медицина батальонну командирини борчларын кютюп, Бурлият буса хас борчлары булангъы медицина къуллукъчуланы взводуну командири гьисапда иш юрютелер.
Россиягъа янгы къошулгъан регионларда хас асгер гьаракат башлангъан биринчи, лап къыйынлы мюгьлетлерден тутуп бажарывлу медицина къуллукъчу Бурлият Смирнова-Загьирова Ватаныбызны якълавчуларына табулуп, ябушув майданларда олагъа биринчи кёмегин болдуруп, сав-саламат кюйде врач ёлдашларына тапшурмакъны оьзюне намус этип ала.
Орта бойлу, чыракъ мелте йимик назик санлы гёрюнсе де, къайыр юрекли Бурлият шо уллу намусну тюбюне гирип, эренлердей оьр даражада кютюп болагъанына, ябушув майданлардан ол чыгъаргъан юзлер булангъы асгерчилени баракалла сёзлери арив шагьатлыкъ эте. Бурлиятны чагъындагъы къатын-къызлагъа олай борчну тюбюне гирип, гётерип де, кютюп болмакъ да гиччи намус тюгюл. Ватанын якълайгъан гьар асгерчини сав къайтажагъын къаравуллап турагъан ата-анасы, дос-къардашлары, кёп сюеген авлетлери барын ол яхшы англай ва оьзюню къолундан гелеген биринчи кёмегин заманында кютмеге гьазир тура.
Асгер ёлдашларыны айтывуна гёре медицина бёлюкню командири, младший лейтенант Бурлият ябушув майданлардан 200-ден къолай яралыны сав-саламат чыгъарма бажаргъан, оланы яраларын багъып, гьалын беклешдирип аякъгъа миндирмек учун госпитальдагъы врачлагъа тапшургъан. Шо гьаракатында ол авур контузия алгъандан къайры да, яралар алып эки керен госпитальгъа тюшген, къолай болгъандокъ асгер ёлдашларыны янына барма алгъасагъан.
Къолу да енгил, сёзю де балгьам медицина къуллукъчу Бурлият, ёлдашларыны ушанып айтывуна гёре «Белла», «Белка», бугюнлерде де оьзю сююп танглагъан касбу борчларына амин къалып, къоччакълыкъны уьлгюлерин гёрсетип къайратлы кюйде къуллукъ этивюн узата.
Гечесин гюнюн бир этип чалышагъан Бурлият Магьамматрасуловна кёп санавдагъы савгъатлагъа да лайыкълы болгъан.
Украинаны Запорожье бойларында юрюлеген хас асгер гьаракатда ортакъчылыкъ этеген атышывчу полкну медицина ротасында взводну бёлюгюню командири младший лейтенант Смирнова-Загьирова Бурлият Магьамматрасуловна командирлени ва Россияны Президенти В.В.Путинни Указы булан «Участнику спецоперации», «За боевые отличия», «За спасение погибавших», «За отвагу», «За храбрость» 2-нчи даражалы ва Жуковну медаллары булан савгъатлангъан.
— Ана Ватанны жанындан артыкъ гёрюп якълама белсенген уланлар, къызлар не ерлерде, нечакъы къыйынлы шартларда болса да оланы савлукъда-саламатлыкъда агьлюлерине къайтып болмакълыгъы бизин учун лап да багьалы, ва сыйлы савгъат. – деп айта бола Бурлият. Шолай дюр де дюр.
Казим КАЗИМОВ.
