Республикабызны агропромышленный комплексини оьсюмлюк-чюлюк ва гьайванчылыкъ тармакъларында хайыргъа ишлемек учун сайламлы урлукъланы болдурувну ва жынслашдырыв ишлени камиллешдиривюню ёрукълашдырывундан кёп зат гьасил бола.

ДР-ни юрт хозяйство ва сурсат министерлигини прес-къуллугъу аян этеген кюйде, гьали-гьалилерде гьайванланы искусственный къайдада балагъа токътатыв иш булан машгъул болагъан касбучуланы республика конкурсу оьтгерилди.

 

Республика конкурсда ДР-ни юрт хозяйство ва сурсат минис­трини заместители Эмин Шейхгьасанов, Магьачкъаладагъы федерал-илму ахтарыв институтну башчысы Нариман Ниъматуллаев ва оьзге ёлдашлар ортакъчылыгъын болдурду.

– Жынслашдырыв ишлени камиллешдиривге артдагъы вакътилерде бизин регионда тергев артып тербей, – деди оьзюню къутлав сёзюнде Эмин Шейхгьасанов. – Гьали болгъанча шогъар байлавлу масъалаланы ёрукъ-лашдырмакъ учун республикабызда айрыча хас пунктлар етишмей эди. Шону учун республика бюджетден тарыкълы къуралланы алып ерлешдирмеге 10 миллион манат харж гёрсетилинди. Айтмагъа сюегеним, узакъ къалмай Дагъыстанда гьайванланы ва къойланы искусственный къайдада балагъа токътатмагъа имканлыкъ береген дагъы да 5 янгы пункт къурулуп пайдаландырывгъа берилежек. Бугюн буса магъа, конкурсну ортакъчыларын гёрмекли агьвалат булан къутлай туруп, уьстюнлюк­лер ёрамакъ къала.

Агьамиятлы конкурсну ортакъчылары Къызылюрт райондагъы «Буйнакскийни атындагъы Агрофирма» деген СПК-ны базасында гьариси оьз бажарывлулугъуна гёре усталыгъын ташдырды.

Оьтгерилген конкурсда биринчи ерге эсгерилген юрт хозяйство –производство кооперативни вакили Али Алиев ес болду. Алдынлы ерлеге ес болгъанлагъа багьалы савгъатлар ва дипломлар тапшурулду.

Ахырында республика конкурсну ортакъчыларына районну инче сатниятыны усталары гьазирлеген концерт программасы гёрсетилди.

 

Къ. КЪАРАЕВ.