Буйнакск райондагъы Янгы Къумукъ юртну маданият къаласында  къысгъа болжалгъа отпускагъа гелген Украина бойда юрюлеген хас асгер гьаракатны ортакъчылары Байтемир Абукъов ва Даниял Ибрагьимов  булан ёлугъув оьтгерилди. Маданият къаланы директору Эдилхан Казимовну  сиптечилиги булан онгарылгъан ёлугъувда юрт администрацияны башчысы Абдурагьман Алхлаев ва юртдагъы школаны охувчу яшлары ортакъчылыкъ этдилер.

 

Татли ашлар ва исси чай булан онгарылгъан берекетли столланы артында  юрюлген гьакълашывну барышында оьзлени лап ювукъ адамлары да асгер гьаракатда ортакъчылыкъ этеген яшлар олагъа гьар тюрлю соравлар берип жаваплар алдылар. Ёлу­гъувгъа гелген асгерчилер де оьз гезигинде яшланы охувлары, школадан бош вакътисинде не ишлер булан машгъул болагъаны, не оюнлар булан иштагьланагъаны гьакъда суаллар берип,  арив лакъыр юрютдюлер.

Эки де якъ учун пайдалы ва таъсирли оьтген ёлугъувну ахырында охувчу яшлар хас асгер гьаракатны ортакъчылары булан эсделикге суратлар алдырды.

 

Казим КЪАГЬРУМАН.