Талатгюн, октябрни 31-нде, Завур Аскендеровну ёлбашчылыгъы булан еттинчи керен сайлангъан Дагъыстан Республиканы Халкъ Жыйыныны  26-нчы сессиясы оьтгерилди. Бир башлап сессияда къаралажакъ масъалаланы гезиги булан депутатланы таныш этгенче, Дагъыстанны Халкъ Жыйыныны председатели Завур Аскендеров Палестина бойда  юрюлеген гьалланы гьакъында оьз ойларын айта.

 

– Дагъыстанны халкълары Ювукъ Гюнтувушда юрюлюп турагъан къувунлу гьалны, къайгъылы дав агьвалатланы къабул этип, гётерип болмай, терен юреклеринден  къаршылыгъын билдирелер. Тек не этерсен, бир-бир питнечи тайпалар рес­публикадагъыланы парахат яшавун чайкъама сююп, оьзлени намарт ва вагьши хыялларыны пайдасына къоллама къаст этелер. Жагьил адамланы бир бёлюгю шо тайпаны чакъырывларына алданып, аэропортда этген низамсыз-законсуз айланышланы ахыры хайыр болмажагъын алданокъ билме герек эдилер. Шолай хыянат ишлер бизин республиканы абурун тюшюрсе тюгюл, оьр этмейгенни англама тезден заман болгъан.  Дагъыс­тан – бизин ортакъ уьюбюз. Мунда дос агьлю болуп, биригип яшай­гъанланы парахатлы­гъын бузма бир заманда да бажарылмас,- дей ол, сёйлевюн тамамлай туруп.

Ондан сонг сёз алгъан парламент фракцияланы ёлбашчылары  Самир Абдулхаликов («КПРФ») ва Камил Давдиев («Справедливая Россия – За правду»)  Хасавюртда ва аэропортда юрюлген жинаятчы ишлени ортакъчыларын айыплап, Россияны Президентини политикасын,  Дагъыстан Республиканы Башчысыны эсгерилген агьвалатлагъа  янашывун якълап сёйледилер ва республиканы жагьиллерин питнечилени намарт хыялларына ий болмай, сабурлугъун сакълап, гьа­къылын жыйып иш юрютме чакъырдылар.

Депутатлар сессияда гюнлюк низамгъа салынгъан масъалалагъа къарама ва бир–бир законланы проектлерине тийишли болагъан алышынывланы этме гиришдилер.

Шоланы арасында «Ата-анасыз къалгъан етим ва сакъат яшланы социальный якъдан къошум гьисапда таъмин этивню масъалалары» деген законну проектине этилеген алышынывлар да арагъа салынды.

– Ата-анасыз къалгъан етим ва сакъат яшланы яшавлукъ шартларын яхшылашдырмакъ муратдагъы ишлер бизге оланы яшавдагъы имкан-лыкъларын бир къадар артдырма ёллар ача. Шолай яшлар оьзлер сюйсе акъчасын тёлемей охума тюшюп, экинчи билим алма ва янгы касбуланы уьйренме болажакълар. Ондан къайры да, гюндюз охуйгъанлар бары да охув ва языв алатлар булан таъмин этилине, уьстевюне, олагъа гьар  айлыкъ кёмек харж да бериле. Къабул этилип яшавгъа чыгъарылажакъ эсгерилген чаралар оланы билимлер алып, оьзлер ушатагъан касбуланы сырларын уьйренип чалышма  муштарлы этежегине шекленме тюшмей, — деген Заур Аскендеров.

Шо гюн сессиягъа салынып къаралгъан бары да масъалалар  къабул да этилген.

 

Казим КАЗИМОВ.