Жавангентли яш кочап Багьавутдин Алибековгъа (суратда ортада) 14 йыл бола. Шо оьмюрню яртысын ол тутушуп ябушувну юрютеген халчада оьтгерген. Спортну кёп сюеген гиччипавну атасы Шагьбан яшгъа 7 йыл битгенде ону юртлу тренер Алберт Магьамматовгъа гелтирген. Арадан гетген йылланы ичинде тренер ва ону тарбиялавчусу спортну эсгерилген журасында кёп тер тёкгенлер. Шо загьматны натижалары артдагъы йыллар арагъа чыгъа башлады.
Къаягент районда артдагъы 20-30 йыл спортну тутушуп ябушув журасына уллу тергев бериле. Мундагъы спорт школаларда бир мингге ювукъ охувчу яшлар, яшёрюмлер тутушуп ябушувну сырларына уьйренелер. Оланы натижалары да гёрмекли. Мисал учун, бу йыл 20 йыл битмеген оьрюм яшланы арасында болгъан Дюнья чемпионатында гьюсемегентли 19 йыллыкъ кочап Ибрагьим Къадиев чемпион атны къазанды. Юртлардагъы оьзге яшлар да алдынлылардан уьлгю ала. Багьавутдин Алибеков шолайланы бириси.
2022-нчи йылда 13 йыллыкъ Багьавутдин 62 кило авурлукъда тутушуп ябушувдан Дагъыстанны ярышларында гьюрметли 3-нчю ерге гётерилмеге бажарды. Оьзюнден оьмюрге уллу кочапланы арасында тутушгъан яш учун бу яхшы натижа болуп токътады. Халчалардагъы уьстюнлю юрюшюн Багьавутдин бу йыл да давам эте. Октябрни 10-нда Къаягент юртда оьтгерилген ярышларда ол 1-нчи ерге гётерилмеге бажарды.
Октябрни 21-22-нчи гюнлеринде Каспийск шагьарда «Кочап» деген ат булан Бютюнроссия ярышлары оьтгерилди. Олагъа Къыргъызстандан, Къазахстандан ва оьзге пачалыкълардан да яш кочаплар чакъырылгъан эди. Ярышланы экинчи гюнюнде 71 кило авурлукъда халчагъа 14 йыллыкъ Багьавутдин Алибеков да чыкъды. Къаныгъывлу тартышывланы натижасында ол оьзюню авурлугъунда 3-нчю ерге гётерилмеге ва бронза медальгъа ес болмагъа бажарды.
Яш кочапны халчадагъы абатлары янгы баш ала. Бизин ягъыбыздан огъар ва ону тренери Алберт Магьамматовгъа бютюнроссия, халкъара ярышларында уллу уьстюнлюклер ёрайбыз.
Магьамматрасул ИБРАГЬИМОВ,
Къаягент район.
