Бабаюрт районну Люксембург юртуну ёлбашчысы Мурат Къадыров   депутатланы юрт жыйыныны ёлбашчысы Исламдин Гьамитов да булан юртлусу,  мобилизациягъа тюшюп асгерде хас дав гьаракатында ортакъчылыкъ этеген вакътиде яраланып,    Мычыгъыш  Республиканы  Ханкъала посёлогундагъы госпитальда ятагъан Абакар Мусаевни гёрмеге  баргъан.

 

Абакар Мусаев булангъы лакъырыны барышында Мурат Къадыров ону савлугъун сорагъан, оьз янындан тарыкъ кёмегин этмеге гьазир экенин билдирген. «Сизин йимик Ватаныбызны илбислерден ва миллетчилерден якълай­гъан игитлер ­оьсюп гелеген яш наслугъа уьлгю болуп токътажакъгъа шеклик ёкъ. Энниден сонг да сизге савлукъ, гьар ишигизде уьс­тюнлюк ва уьйлеригизге эсен-аман къайтмакъны ёрайбыз», – деген Мурат Къадыров.

33 йыллыкъ   А. Мусаев элини къоччакъ уланы гьисапда, уьюнде агьлю-сю ва 3 гьакъылбалыкъ болмагъан яшы баргъа да къарамай, Ватаныбызны якъламагъа биринчилерден болуп хас асгер гьаракатына гетген эди. Оьзюню ёлдашлары булан алдына салынгъан дав тапшурувланы кюте туруп, къоччакъ кюйде Донбассны халкъыны азатлыгъын якълагъан. Амма душманны гюллеси ону да аямагъан, яра тийгенге де къарамай, Абакар дав ёлдашларын ташлама­гъан. Атышыв сейир болгъан сонг, ол санитар бёлюкге етишдирилген. Онда башлапгъы медицина кёмекни алгъан сонг, ол къуллукъ этеген гьамангъы асгер бёлюгюндеги госпитальгъа бакъдырылгъан.

Хас дав гьаракатда гёрсетген игитлиги ва къоччакълыгъы учун, Абакар Мусаев Россияны Президенти Владимир Путинни указына гёре, Жуковну медалы булан савгъатлангъан.

Ол оьзюне гьюрмет этип   гелгенлеге разилигин билдире туруп, уьюне уьстюнлюкню алып къайтма умутлу экенни билдирген.

Ери гелгенде, хас дав гьаракатда ортакъчылыкъ этген Бабаюрт районлу уланланы кёбюсю гёрсетген къоччакълыгъы ва игитлиги учун орденлер ва медаллар булан савгъатланып турагъанны эсгермеге сюемен ва оланы барысына да, уьстюнлюк  алып,  уьйлерине сав–саламат  къайтмакъны ёрайман.

 

Герейхан ГЬАЖИЕВ,