Союзуну биринчи ёлбашчысы
17-нчи октябрде белгили къумукъ шаир, публицист ва пачалыкъ чалышывчу Багьавутдин Астемиров тувгъанлы 125 йыл битди. Хасавюрт районну китапханаларында шо агьвалатгъа багъышлангъан чаралар оьтгерилген. Охувчулар булангъы ёлугъувларда китапха-наланы ёлбашчылары Багьавутдин сабанчы агьлюде тувса да, оьзюню гьаракаты булан охугъан, билим алгъан ва оьр пачалыкъ къуллукъларда ишлегени гьакъда айтгъанлар.
10 китапны автору Багьавутдин Астемиров Дагъыстанны язывчуларыны Союзуну биринчи председатели этилип сайлангъан ва кёп миллетли республиканы пагьмуларын арагъа чыгъармакъ учун къаст этген. Ол Совет Союзну язывчуларыны биринчи съездини ортакъчысы ва М.Горькийни къабул этивю булан шону правлениясына сайлангъан.
Дагъыстан Обкомну бюросуну ортакъчысы Б.Астемиров «Яш дагъыстанлы» деген газетни редактору, 1929 – 1937-нчи йыллар буса Дагъыстанны билим берив комитетини ёлбашчысы болуп ишлеген. Ялгъан яла ябулуп, айыпсыз 15 йыл туснакъларда олтургъан, 1955-нчи йылда реабилитация этилген. Къайратлы загьматы учун «За трудовую доблесть» медаль булан савгъатлангъан.
Б.Астемировну аты шагьарлардагъы орамлагъа, 1999-нчу йылда Магьачкъаладагъы 39 номерли лицейге тагъылгъан.
Хамавюртдагъы китапхананы ёлбашчысы Гьава Багьалаева Багьавутдин Астемировну гьакъында охувчу яшлагъа толу кюйде хабарлады. Белгили, эревюллю уланларыбызны атын унутма тюшмейгенни ва шоланы тарбия береген асарларын къайтып-къайтып охума чакъырды.
Г. БЕК.
