Октябр айны 16-сында Р-217 «Кавказ» деген федерал ёлну янгыртылгъан гесеги ачылывгъа байлавлу чара оьтгерилди. Шону ачывда ВКС къайдада Россияны Президенти Владимир Путин де ортакъчылыкъ этди. Ол эсгерген кюйде, «Къоркъунчсуз сан янлы ёллар» деген милли программагъа гёре, бу йыл Россияда 180 миллион квадрат метр ёллар ярашдырылажакъ. «Темиркъазыкъ-Къыбла» деген транспорт ёл инг аслу ёлланы бириси болуп токътай. Мычыгъыш Республикадан Азербайжан дазугъа ерли 274 чакъырым барын ва шо Ювукъ Гюнтувушгъа чыгъагъан аслу ёл болуп токътайгъанны айтды.
Гертиден де, шо ёлдан гюнде 35 минг машин юрюй, инг аслу масъала, шоланы къоркъунчсуз машин гьайдап болагъан даражагъа гелтирмек. Ёл инамлы буса, узунлугъу къоркъунчсуз деп негьакъ айтылмай.
Шо гюн ачылгъан Эндирейден Эсги Бавтогъайгъа ерлиги мезгил гьар якъгъа экишер машин юрюйген кюйде генглешген ва арасы бегетилген. Шо буса машинлени бир-бирине урунувдан сакълай.
Сергей Меликов билдирген кюйде, ёлну эсгерилген боюндагъы ишлер давам этиле ва бу йылгъа гёрсетилген 17 миллиард манат къурувчулагъа етишген.
Ёлланы ярашдырыв промышленностну ва юрт хозяйствону оьсювюн болдурувдан къайры, туристлени регионгъа гелме амыракъ этежеги де гьисапгъа алынма герек. Шону учун ёл бойда къонакъюйлер, ашханалар ва тюкенлер де къурулажакъ.
С.Меликов Президентге баракалла билдире туруп, бу йылдан башлап «Уьйташ» аэропортгъа самолётлар къонагъан янгы сызакъ этилежеги, Азербайжангъа барагъан 4 транспорт ва 1 темир ёл, Магьачкъаладагъы портгъа айрыча ёл этилежеги ва Хасавюрт, Магьачкъала ва Дербент шагьарланы айланып оьтежек ёллар къурулажакъны да билдирди.
Дагъыстан Россияда аслу регионланы бириси болуп токътай ва янгыртылгъан ёлланы маънасы бырынгъы заманлардагъы Чилле ёлну даражасындан да артыкъ болма имканлы.
