Гьали-гьалилерде, Дагъыстан Республиканы юрт хозяйство ва сурсат маллар болдурагъан министрини биринчи заместители Шарип Шарипов Хумторкъали райондагъы «Уьчгент» деген СПК-ны сынав учун чачылгъан чита авлагъында болду.
«Уьчгент» СПК Хумторкъали районну юрт хозяйство управлениеси ва Дагъыстан Республиканы юрт хозяйство ва сурсат министерлиги булан сёйлешип, бир гектар ерге, июн айны 15-де, сынав учун читаны геч болагъан журасын чачгъан эди. Шарип Шарипов Хумторкъали районну юрт хозяйство управлениесини начальниги Магьаммат Агъаев булан сынав учун чита чачылгъан авлагъына бардылар.
– Июн айны 15-де сынав учун чачылгъан чита сан янындан да, санав янындан да адам инанмасдай арив гьасиллер гёрсетди. Шо бир гектаргъа чачылгъан читадан 550-600 центнер чита алма хыялыбыз бар. Язны яллавунда чачылгъан читаны гелеген йылны март айлары болгъунчагъа сакъламагъа бола. Язбашда болдурагъан читаны олайын узакъ сакъламагъа бажарылмай. Гелеген йыл, «Уьчгент» СПК-ны ёлбашчысы айтагъан кюйде, читаны «Боливир» деген жынсын 10 гектар ерге чачмагъа сюе, – дей Магьаммат Агъаев.
«Уьчгент» хозяйствону ёлбашчысыны заместители Магьаммат Иманмагьамматов айтагъан кюйде, «Уьчгент» СПК бу йыл 125 гектар ерге тюрлю-тюрлю бахча емишлер чачгъан эди. Шону 25 гектар ерине чита, 4 гектарына буса – къызыл чювюннюр, къалгъан авлакълагъа буса согъан чачылгъан.
Геч болгъунча сакълама болагъан читаны гюзгю журалары, сынавну гьасиллери гёрсетеген кюйде, гелимли ва пайдалы. Геч чачылагъан читаны тюшюмю язбашда чачылагъанындан эки керенге артыкъ. Бахча емишлени оьсдюрювчюлерини сиптесин якълайгъаны учун Дагъыстан Республиканы юрт хозяйство ва сурсат министерлигине ва Дагъыстан Гьукуматына разилигибизни билдиребиз. Гележекде де бахча емишлени гюзлюк жураларын чачывну ва оьсдюрювню генглешдирмеге мурадыбыз бар, – дей Магьаммат Иманмагьамматов.
Жават ЗАКАВОВ.
