Тюнегюн, октябр айны 11-нде, Къарабудагъгентдеги гиназияда гьар тюрлю йылларда шо охув ожакъда торайып гелеген яш наслугъа терен ва мугъкам билим беривге ва тарбиялавгъа белсенип чалышып тургъан муаллимлени эсделигине багъышлангъан мемориал такъта ачылды.
Шо агьвалатгъа байлавлу оьтгерилген гьаракатда Къарабудагъгентдеги гимназияны муаллимлеринден ва охувчу яшларындан къайры да, эсгерилген муниципал къурумуну жаваплы къуллукъчулары, олай да инг асил касбуну юрюте туруп яшавдан гетген муаллимлени ювукъ адамлары, дос-къардашы ортакъчылыкъ этди. Инг алда Къарабудагъгентдеги гимназияны директору, район жыйыныны ёлбашчысы Адил Салаватов жыйылгъанланы алдына чыгъып сёйледи. Ол оьзюню сёйлевюнде бары иш ёлдашларыны атындан гелгенлеге разилигин билдирди. Яшавну агъымын алышдырмагъа бажарылмай буса да, тек арабыздан гетген асил адамланы гьакъындагъы эсделикни гьар къайсыбызгъа да сакъламагъа тюшегени гьакъда айтды. Шону булан бирге, оьзлени атлары даимлешдиреген муаллимлер ва охув ожакъны ёлбашчылары янгыз юртну тюгюл, савлай районну билим берив тармагъына аслам къошум этгени, эл арада, халкъ арада герти абургъа-сыйгъа лайыкълы болгъаны гьакъда билдирди. Оланы асиллиги, адилиги, гьарисини айрыча ярыкъ келпети оланы таныгъанланы эсинден бир де таймажагъын ташдырды.
Шондан сонг, Къарабудагъгент районну гьакимбашы Магьмут Амиралиевни атындан ону заместители Жалалутдин Жамалутдинов оьзюню гезигинде шо гюн оьтгерилеген агьвалатны агьамиятлыгъы гьакъда айта туруп, атлары даимлешдирилеген муалимлени гьакъында билгенден къайры да торайып гелеген наслуну вакиллери олардан уьлгю яшав къурма къаст этмеге тюшегени гьакъда айтды.
Шо гьаракатны барышында охувчу яшлар муаллимни алгъышлайгъан, школа яшавгъа багъышлангъан шиъру сатырланы да чебер кюйде охуп алды. Адил Салаватов ва Жалалутдин Жамалутдинов бирче муаллимлени эсделигине багъышлангъан мемориал такътаны уьстюне тартылгъан акъ шаршавну тюшюрген сонг, жыйылгъанлар гюл байламлар салдылар. Шолайлыкъда, олар мармар ташда ярыкъ келпети ва атлары даимлешдирилген муаллимлеге оьзлени янындан этилеген абур-сыйны исбатлады.
Н. БАЙБОЛАТОВ.
