Дагъыстанны топуракъ шартлары емишлени ва овощланы болдурмагъа нечакъы бола буса да онгайлы экенин заман оьзю арив гёрсетип тура. Чинкдеси, шоланы гьарисини татыву да ашап тоюп болмас йимик де дюр. Айрокъда тышдан бизге гелип емишлерибизни татывлап къарагъанлар о гьакъда авзундан бал тамдырып айтагъаны да шогъар бир жанлы шагьатдыр.
Бизде бавчулукъну янгыртывгъа артдагъы йылларда пачалыкъ даражасында агьамият бериле башлагъанлыкъ бавланы оьлчевлерин артдырмагъа шайлы кюйде болушлукъ да эте.
Гьалиге Дагъыстанда емиш бавлар 28 минг гектардан да къолай ерни къуршагъан. Шоланы да 22,1 минг гектары емиш береген чагъындагъы тереклер.
Гетген йыл республикада савлай алгъанда 210 минг тондан да къолай емиш чёпленген эди. Ювукъ йылланы ичинде Дагъыстанда болдурулагъан емишлени бары къадарын 250 минг тондан да къолай этмеге къаст гёрюле.
Бу 2023-нчю йыл емишни къадарын гетген йылгъысындан эсе 10 процентге артдырмагъа имканлыкъ бар.
Тюзю, бизде емишлени ломайлап къабул этеген заводлар ёкъ деп айтса да ярай. Шо себепден бавчулар кёбюсю гезиклер къасткъылып болдургъан емишлени оьзлер айтагъан кюйде хайыр алып батдырып болмай инжинелер.
Мени бир жюнгютейли танышым гетген йыл алманы нечик сатып тайдырагъанны билмей эди. Базардагъылар алай арив алманы килосун 20 манатдан да лма сюймей болгъан. Олайлар дагъы да кёп бар. Шону учун да, гьазир ишлетип емиш продукция чыгъарагъан заводлар алда йимик болмагъан сонг, салып шоланы узакъ сакълайгъан хас ерлени сама кёп къурмакъны гьайын этмеге тюшедир.
Тюзю, Дагъыстанда шолай ерлени гючюн 2025-нчи йылгъа таба 1,5 керен артдырмакъ гёз алгъа тутулгъан. 15 минг тон продукцияны сакълайгъан ерни кёмекчилени харжына къурагъан кюйню этмеге бажарыла тура деген хабарлар да бар.
Абдулла ЗАЛИМХАНОВ.
