Бизин сагьифада алда да айтылгъан йимик, бусурман рузнамагъа гёре рабби-уль-авваль ай Аллагьны ахырынчы Элчиси болгъан Магьаммат Пайхаммар (а. с.) дюньягъа гелген ай гьисаплана. Биз гьар гюнлюк яшавда къоллап турагъан григориан рузнамагъа гёре Ону тувгъан гюню бугюнлеге рас гелгенин гёз алгъа тутуп, бу гезик де сизин тергевюгюзге Магьаммат Пайхаммарны (а.с.) дюньялыкъ яшаву булан байлавлу тюпдеги шу макъаланы бермекни тийишли гёрдюк.
Магьаммат Пайхаммарда (алайгьи салам) оьктемликни бир къырыйы да болмагъан. Ол аякъгийимлени де ярашдыра болгъан, эсги опуракъ гийип де юрюген, тарыкъ болгъанда, йыртылгъан ерлерин де тикген, агьлю ишлерде уьйдегилерине кёмек этген. Ол уялчан адам болгъан ва биревню бетине де гётерилип къарамагъан. Оьзюн чакъырса, къулгъа да, эркин адамгъа да бара болгъан. Магьаммат Пайхаммар (алайгьи салам) не савгъатны да къабул эте болгъан. Пакъыр яшайгъан адамгъа уьстден къарамагъан, бай адамгъа да ялынмагъан. Къатынына да, кёмекчисине де бир де урушмагъан. Бир урушда огъар душманланы налатламагъа тилегенде: «Мен рагьму гьисапда йиберилгенмен, налатлайгъан гьисапда йиберилмегенмен», – деп жавап берген.
Магьаммат Пайхаммар (алайгьи салам) кимни гёрсе, оьзю биринчилей къаршылап, салам бере болгъан. Аллагьны эсгермей туруп, Ол бир де я олтурмай, я еринден эретурмай болгъан. Оьзю намаз къылагъан вакътиде бирев гелсе, Ол тез намаз къылып, оьзюне не къуллукъ булан гелгени гьакъда сорай болгъан.
Ол оьзю аз ашай болгъан. Магьаммат Пайхаммар (алайгьи салам) булай айтгъан деп эсгерген Имам Агьмат «… Адамгъа къаркъарасыны гючюн сакъламакъ учун гюнню узагъында бир нече аш гесек таманлыкъ эте. Тек ол артыкъ ашамагъа сюе буса, ашкъазанны уьчден бир пайын азыкъдан, бирдагъы бир пайын сувдан толтурмагъа, къалгъан пайын да тыныш алмагъа къоймагъа тарыкъ».
Магьаммат Пайхаммар (алайгьи салам) уьюнде ашамагъа тапгъаны булан тамамлана болгъан. Янгыз кабахурма тапса, шону экмексиз ашай болгъан. Ол экмек ашай буса, шогъар башгъа къатыкъ къошмай болгъан. Магьаммат Пайхаммар (алайгьи салам) бир де аш татывсуз деп айтмагъан, шону ушатса – ашай, ушатмаса, къоя болгъан. Ашап битгенде де къолларын жувуп, бетин де сыйпай болгъан. Сувну, не де башгъа синген ашамлыкъны даим Аллагьны атын эсгерип, гьар ютумундан сонг Аллагьгъа макътав этип, авазсыз ичген. Ичеген хабагъа да пусун бир де йибермеген.
Олтурагъанда Магьаммат Пайхаммар (алайгьи салам) тобукъларын къучакълап олтура болгъан. Ашайгъанда буса, намазда олтурагъанда йимик олтура болгъан. Ол: «Мен къулман, шо саялы олтураман ва ашайман къул йимик»,– деп айта болгъан. Жамият арада дюньялыкъ хабарлар юрюлегенде де, ахыратны гьакъында сёйленегенде де Магьаммат Пайхаммар (алайгьи салам) ариде къалмай ортакъчылыкъ эте болгъан.
Магьаммат Пайхаммарны (алайгьи салам) сёзю сабурдан, алгъасамай ва тынгламагъа къулакъгъа нече де арив тие болгъан. Сёзлери шиъруларда йимик къапиялы ва бир-бирине къыйышывлу гелген. Гьар заман да адамлагъа яхшы ва пайдалы насигьатлар берген.
Ол авазсыз кюлей болгъан. Асгьабалар да Огъар гьюрмет этип, Ону булан бирче кюлей болгъан. Ол да оланы бир де токътатмагъан.
Магьаммат Пайхаммар (алайгьи салам) гьар заманда да саламат гийинген. Ол аслу гьалда акъ тюслю опуракъланы танглай болгъан. Жуманамазгъа деп Ону айры опурагъы болгъан. Чалмасыны тюбюнден къапа гие болгъан. Бир-бирде Ол къапасын чалмасыз да гие болгъан. Опуракъны Ол онг якъдан гийген ва Аллагьутаалагъа бизин безендирген ва ялангъачыбызны яшыргъан саялы макътав эте болгъан. Опурагъын чечегенде буса, Ол сол якъдан башлай болгъан. Янгы опуракъ гиегенде, эсгисин амалсыз яшайгъанлагъа бере болгъан.
Магьаммат Пайхаммарны (алайгьи салам) елбегей гийими де болгъан. Ол ону сюннет намаз къылагъанда тюбюне яя болгъан. Бир-бирде Ол янгыз чыптаны уьстюне йымышакъ болсун учун дагъы гьеч бир зат да яймай ятып къала болгъан.
Магьаммат Пайхаммар (алайгьи салам) адамланы арасында лап чомарты ва рагьмулусу болгъан. Рамазан айда Ону чомартлыгъыны дазусу болмагъан. Огъар тилеген бирев де бош гетмеген. Тиленчилер тилей гелгенде, Магьаммат Пайхаммарны (алайгьи салам) уьюнде бир зат да болмай къалгъанда, Ол сатывчулардан олагъа герекни алдыртып, борчну оьзюню атына яздыра болгъан. Ону къолунда бир де акъча къалмай болгъан. Оьзюндеги бары да акъчаны гьажатлылагъа бермей туруп, Ол уьюне къайтмай болгъан.
Магьаммат Пайхаммар (алайгьи салам) къоркъувну билмейген лап да къоччакъ адам болгъан. Ол душмангъа лап да ювукъ болгъанда да къоркъув не экенин билмеген.
Магьаммат Пайхаммар (алайгьи салам) янгыз Аллагь учун къазаплана болгъан. Адам ушатмайгъан сёзню де айтмагъан. Тюзсюзлюкге тюгюл эсе, оьзге гезиклерде ачувланмагъан.
Насрулла БАЙБОЛАТОВ.
