Магьачкъала шагьардагъы Расул Гьамзатовну атындагъы милли китапханада сентябр айны 27-нде хас асгер гьаракатгъа багъышлангъан сурат выставканы ачылыву болду. Эсгерилген выставкада  Украи­нада юрюлеген хас асгер гьаракатны вакътисинде «Российская газетаны»  военный корреспондетлери чыгъаргъан суратлар ерлешдирилген. Гьар сурат  хас белги булан белгиленген.  Шону булан пайдаланы сурат къайда,  не ерде, не йимик агьвалатланы вакътисинде чыгъарылгъанын билмеге бажарыла. «Российская газетаны»  баш редакторуну къыбла филиалдагъы заместители Роланд Льянов  сурат выставканы ача туруп, булай деди:

 

– «Российская газетаны» Къыбла филиалыны мухбирлери Донбассны территориясында 2014-нчю йылдан берли юрюлеген дав гьаракатларда ортакъчылыкъ эте. Олар 2022-нчи йылны феврал айында башлангъан  хас асгер гьаракатлатны биринчи гюнлеринден тутуп да касбу борчларын кюте. Шо вакътини ичинде мухбирлер  100-лер булан репортажлар, документли фильмлер, минглер булан суратлар чыгъаргъан. Выставкада ерлешдирилген суратлар  Донецк, Луганск, Мариуполь ва башгъа шагьарланы орамларында хас асгер агьвалатны вакътисинде чыгъарылгъан.  Бу выставка Симферополь шагьарда да болду. Магьачкъалада октябр айны 5-не ерли юрюлежек.

Выставкада  мухбир Николай Грищенко чыгъар­гъан суратлар да ерлешдирилген. Шоланы гьакъында айта туруп, ол бары да суратлар, гертилей де, болгъан агьвалатланы заманында чыгъарылгъанын, шонда  кёп санавда Дагъыстанлылар булан ёлукъгъанын эсгерди.

Выставканы ачылывунда Магьачкъала шагьарны башчысыны заместители Эмилия  Ражапова, ДР-ни печат ва маълумат агентлигини ёлбашчысыны 1-нчи заместители Найида Магьамматова ва башгъалар сёйледилер.

 

П. БЕКЕЕВА.