Алдагъы жумада Дагъыстанда 2 гюнню узагъында «Историко-культурное наследие России» деген парламент форум оьтгерилди. Форумну Федерация Совети Дагъыстан Республиканы Гьукуматы булан бирликде оьтгерди ва халкъ шаир Расул Гьамзатов тувгъанлы 100 йыллыкъ юбилейге багъышлады.
Шонда Федерация Советини Председатели Валентина Матвиенко, ону 1-нчи заместители Андрей Яцкин, РФ-ни Президентини администрациясыны ёлбашчысыны заместители Магьамматсалам Магьамматов, Пачалыкъ Думаны депутатлары, сенаторлар регионланы Башчылары, жамият чалышывчулар, гьакимият къурумланы вакиллери ортакъчылыкъ этди. 9-нчу Парламент форумну пленар жыйыны «Маданият варислик – милли аралыкъланы кюрчюсю» деген теманы айланасында Дербент шагьарда юрюлдю. Жыйын башлангъынча форумну бары да ортакъчылары Дербент шагьарны гёрмекли ерлеринде гезеди. Нарынкъалагъа, музейлеге барып, бизин республиканы халкъ яратывчулукъ санияты булан таныш болду.
Жыйынны ачмагъа ва Президент В.Путинни къутлавун охумагъа Магьамматсалам Магьамматовгъа ихтияр берилди: «Дагъыстан Россияны табиаты гёзел, кёп миллетли халкъы дослукъда яшайгъан регионну халкълары бек пагьмулу ва оьзлени ата-бабаларыны адатларына, маданиятына амин кюйде яшай. Дагъыстанда коччакъ адамлар, белгили алимлер ва усталар, язывчулар, пачалыкъ ва дин чалышывчулар оьзлени къасты ва загьматы булан ана топурагъын ва уллу Ватаны Россияны макътавлу этген. Бизин кёп динли ва кёп миллетли уьлкебизде адатланы, мердешлени сакъламакъ , гьар халкъны маданиятына, тилине гьюрмет этмек парахатлыкъны ва бирликни кюрчюсю экенни яхшы англайбыз. Халкъланы бирлиги бизин гючлю ва оьр эте»
Валентина Матвиенко оьзюню сёйлевюнде: «Форум Россияны маданиятын, ону байлыгъын артдырма ва сакълама сюегенлер учун бирлешивню ери болду. Дагъыстанны бары да ватандашларына ачыкълыгъына, къонакъчылыгъына баракалла билдирме сюемен . Сергей Алимовичге форумну бары да чараларын оьр даражада оьтгергени учун баракалла. Жыйын Дербентде оьтгерилегени негьакъ тюгюл, Дербент янгыз эсги шагьар тюгюл, ачыкъ кёкню тюбюндеги музей. Нарынкъала, жума межит ва башгъа биналар бютюн дюньяны маданият байлыгъыны жавгьарлары»,–деди.
В.Матвиенко Расул Гьамзатовну яратывчулугъун Россияны школа программасына къошмакъны таклиф этди. Шолай да, ол Маданият къуллукъчу» деген программаны башламагъа гёз алгъа тутгъанын, Россияда маданият тармакъда касбучулар етишмейгенин ва шо себепден яшёрюмлени маданият, инчесаният, патриот ругьда тарбиялав акъсама болагъанын эсгерди.
Форумда С. Меликовну Дербент шагьаргъа 2 минг йылдан артыкъ болагъанны исбатлайгъан далиллер барлыгъын ва шону Россияны илму Академиясы токъташдырмагъа герек деген таклифин В.Матвиенко да якълады. Жыйында дагъы да кёп тюрлю масъалалагъа тергев берилди. Форумну ишинде 15 пачалыкъдан 300 адам ортакъчылыкъ этди.
Магьачкъаладагъы милли китапханасында гьар тюрлю миллетлени ва башгъа-башгъа динлени юрютегенлени, олай да пачалыкъланы арасында татывлукъ болдурувгъа, дослукъну беклешдирип, бирге чалышывну ёлларын белгилевге байлавлу пикру алышдырыв форумну оьлчевюнде болгъан маъналы агьвалатланы бириси болуп токътады.
