Гьар йыл къышда, бу йыл чы яйда да, адамланы электрик гюч булан таъмин этивде кёп тюрлю масъалалар ва соравлар арагъа чыгъа. Шо гьакъда гьали-гьалилерде Дагъыстанны Халкъ Жыйыныны генгешинде де айтылды. Парламентни председатели Завур Аскендеров «Россети Северный Кавказ» деген компаниягъа, шону Дагъыстандагъы «Дагэнерго» бёлюгюне электрик гючлер янгылмай гелеген ва сан янлы ишлейген кюйню болдурмакъны талап этди. Айтмасдай да тюгюл, оьтген заманны ичинде республикада 400 керенден де артыкъ ток тайгъан. Шо жыйында гьалны къолайлашдырмакъ учун къошум харж гереклиги гьакъда да айтылды.
«Россеть» деген холдингни башчысы Андрей Рюмин электрик гючлер янгылмайгъан кюйде этмеге Дагъыстангъа 2 миллиард манат гёрсетилгенни айтды. Къоллангъан токгъа берилеген акъча жыйылмайгъанны, майнинг фермалар ишлейгенни ва ток урланагъанны гьакъында да эсгерди, тек шо ишлени ким аян этме гереги айтылмады.
«Дагэнергону» прес-къуллугъу билдиреген кюйде, республикада 8 айны ичинде 1300 багъана алышдырылгъан, 616 трансформатор станция ярашдырылгъан ва 570 чакъырым ердеги ток теллер янгыртылгъан.
Магьачкъала шагьар администрацияны башчысы Юсуп Умавов шо жыйында тахшагьардагъы энергетика масъаланы чечмек учун 720 миллион манат берилгенни айтды.
Магьачкъала горсетни баш инженери Ражап Абакаров билдиреген кюйде, бугюнлерде тахшагьарда ярашдырыв ишлер юрюлюп тура. Биринчилей, тозулгъан, эсгиленген ва уллу гючлеге чыдамайгъан кабеллер алышдырылажакъ. Ишни биринчи тиретинде ва йылны ахыры болгъанча 23 уллу электрик гюч юрюйген кабеллер ва 27 чакъырым теллер алышынажакъ.
Бир айдан чакъгъа салкъынлыкъ тюшежек, эки айдан буса къыш башланажакъ. Энергетиклер къышгъа нечик гьазир болгъанны чакъны сувукълугъу билдирер.
