Бирден бёлюнген сапар
Артдагъы жума Дагъыстанда туристлер булан байлавлу болгъан къайгъылы агьвалатлагъа Россияны Ахтарыв комитетини предсе-датели А.Бастрыкин тергев берген ва ону тапшурувуна гёре уголовный ишлер ачылгъан.
Сентябр айны 10-нда, эртен сагьат тогъуз битип, Магьачкъала-Талги-Буйнакск ёлну 10-нчу чакъырымында 40 йыллыкъ магьачкъалалы низамны бузуп, «Жигулиси» булан къаршы гелеген микроавтобусгъа бетге-бет урунгъан. Хатабалагьда 10 адам яралангъан. Гечге таба оланы бириси азарханада оьлген. Машинлени гьайдавчуларындан къайры, къалгъанлары – уьлкени гьар тюрлю регионларындан гелген туристлер.
Артындагъы гюн Къазбек районну Чиркей юртундагъы «Солакъ» деген ял алагъан базада 5 метр бийиклиги булангъы бетон барулар тюбюнде токътагъан машинни уьстюне авуп янчгъан. Машинни ичиндеги 23 йыллыкъ къызъяшгъа сав къалмагъа бир имканлыкъ да болмагъан. Ону ёлдашы шо мюгьлетде, насибине, сигарет тартма чыкъгъан болгъан. Тек огъар да врачлардан кёмек излемеге тюшген.
Оьлген тиштайпа Дагъыстангъа Новосибирскиден бир нече ай алъякъда гелген болгъан. Ол оьзюню анадаш шагьарында пагьмулу сурат чыгъарывчу гьисапда танывлу. Тавлар элине этген сапарындан сонг, айрыча сурат альбом чыгъармагъа умуту бар болгъан.
Россияны Ахтарыв комитетини Дагъыстан ахтарыв управлениесини маълумат бёлюгю билдиреген кюйде, «Солакъ» базаны есиси тутулгъан. Ахтарывчулар токъташдырагъангъа гёре, онгача далапчыны шо ерде базаны къурма ихтияр береген документлери ёкъ.
Алав АЛИЕВ
