Оьтген гюнлерде Бабаюрт район администрацияда Дагъыстанны аманлыкъ Советини секретары Магьаммат Баачиловну ортакъчылыгъы булан, ватандашланы дыгъар байлап асгер къуллукъгъа чакъырывгъа байлавлу республикада къурулгъан иш группасыны жыйыны оьтгерилди.
Жыйында Дагъыстан Республиканы Халкъ Жыйыныны депутаты Г. Османов, районну ёлбашчысы Даниял Исламов, юрт администрацияланы ёлбашчылары ва Украинабойда юрюлюп турагъан хас дав гьаракатыны ортакъчылары, районну къурумларыны ва къуллукъларыны ёлбашчылары ортакъчылыкъ этдилер.
Жыйынны ача туруп, районну башчысы Даниял Исламов жыйылгъанланы къонакълар булан таныш этди ва Дагъыстанны Аманлыкъ Советини секретары Магьаммат Баачиловгъа сез берди. М. Баачилов оьзюню сёйлевюнде Бабаюрт район бугюнлерде республиканы яхшы районларыны бирисе саналагъанны айтды.
– Районда жамият-экономика масъалалар кёбюсю гьалда пайдалы кюйде чечиле ва бир-бир этилген ишлени гёрсетивлерине къарагъанда, район республиканы алдынлы районларына санала –, деп эсгерди Россияны Игити М.Баачилов.
Жыйында аслу гьалда дыгъар байлап, ватандаш борчун кютюв ва шогъар байлавлу масъалаланы арагъа салып пикирлешив юрюлдю.
Магьаммат Баачилов юрюлеген дав гьаракатны гьалына гёре англатыв бере туруп, бу ишде далапчыланы, онгача иш гёрегенлени къуршап биригип иш гёрмеге тюшегенни айтды.
– Буюгюн бизин уьлкебизде болуп турагъан гьаллар биреню де талычыкъдырмай тюгюл. Фронтдагъы бизин яшлагъа кёмек герек. Шо кёмекни къолуна янгыз савут алып тюгюл, бугюн дав этеген яшланытарыкъ алатлар булан таъмин этмеге бажарыла, – деди М.Баачилов.
Ону пикурусуна гёре, далапчылар къыйын ерлерде ёл алып болагъан машинлер ва бугюнлерде хас дав гьаракатда лап тарыкълы болагъан оьзге тюрлю хастехниканы алмагъа кёмек къолун узатса, бизин асгерчилеге хыйлы кёмек болажакъ.
Дыгъаргъа гёре асгерге чакъырыв масъаланы гётере туруп, Магьаммат Баачилов шолай ватандашлагъа гёрсетилеген социал тёлевлени ва оланы гьайын этивню пачалыкъ бютюнлей оьзюне алгъанны да эсгерди. Озокъда, бизин районда Россияны оборона министерлиги булан дыгъар байлап, Ватан борчун кютмеге гетмеге сюегенлени санаву кёп тюгюл. Шогъар гёре де М. Баачилов юрт администрацияланы ёлбашчыларына, бу ишде районну ёлбашчысын ва хас дав гьаракатдагъыланы янын тутмакъны таклиф этди.
– Хас дав гьаракатыны ортакъчыларыны, онда жанларын къурбан этгенлени ва оланы агьлюлерини гьайын этмек – бизин алдыбызда токътагъан алдынлы масъалаланы бириси. Олар бизге тюгюл, биз олагъа борчлубуз ва шо борчну бизин башыбыздан бирев де, бир заманда да тайдырмажакъ,– деди, сёйлевюн тамамлай туруп, М.Баачилов.
Жыйынны барышында чыгъып сёйлеген хас дав гьаракатны ортакъчысы, туршунайлы Шамил Абуталимов Магьаммат Баачиловгъа оьзюню суд гесилип такъсырлангъаны гьакъындагъы масъаласын чечивге бугюнлерде де къаралмагъаны гьакъда билдирди. М. Баачилов Россияны ич ишлерини Бабаюрт район бёлюгюню ёлбашчысыны заманлыкъгъа ишлерин кютеген Рамазан Магьмудовгъа аз заманны ичинде шо масъалагъа тергев берип, ону чечмекни тапшурду.
1 номерли Львовский юртдан гетген дав гьаракатны ортакъчысы Багьавдин Салаватов да жыйылгъанланы ондагъы гьал булан таныш этди. Жыйында оьз гезигинде чыгъып сёйлеген Ренат Магьамматов да дыгъаргъа гёре асгер борчун кютмеге сюегенлеге дагъы да не йимик шартлар яратылажагъы гьакъда айтды ва англатыв иш юрютмеге чакъырды.
Жыйынны гьасилине гёре юрт администрацияланы ёлбашчыларына тапшурувлар берилди ва оланы кютювге болжаллар да салынды.
Герейхан ГЬАЖИЕВ,
бизин мухбирибиз.
